ടൊറൻ്റോ സിറ്റി ഹാളിലും മറ്റ് നഗര കേന്ദ്രങ്ങളിലും വിദേശ പതാകകൾക്ക് നിരോധനം, പുതിയ നിയമം പാസാക്കി ടൊറൻ്റോ സിറ്റി കൗൺസിൽ

പതാകകൾ ഉയർത്തുന്നതുമായി ബന്ധപ്പെട്ട് പുതിയ നിയമം പാസാക്കി ടൊറൻ്റോ സിറ്റി കൗൺസിൽ. സിറ്റി ഹാളിലും മറ്റ് നഗര കേന്ദ്രങ്ങളിലും വിദേശ രാജ്യങ്ങളുടെ പതാകകൾ ഉയർത്തുന്നത് നിരോധിച്ചു കൊണ്ടുള്ള നിയമമാണ് പാസ്സാക്കിയത്. 19 പേർ അനുകൂലിച്ചും ഏഴ് പേർ എതിർത്തും വോട്ട് രേഖപ്പെടുത്തി. 2026 ഡിസംബർ ഒന്ന് മുതലാണ് ഈ പുതിയ നിയമം നിലവിൽ വരുന്നത്.

ഇനി മുതൽ ഈ സ്ഥലങ്ങളിൽ കാനഡയുടെ പതാകയും ടൊറൻ്റോയുടെ പതാകയും മാത്രമേ അനുവദിക്കൂ. “വൺ കാനഡ, വൺ ഫ്ലാഗ്” എന്ന പേരിലായിരുന്നു ഈ പ്രമേയം അവതരിപ്പിച്ചത്. കൗൺസിലർ ജോൺ ബേൺസൈഡ് ആണ് ഈ നിർദ്ദേശം മുന്നോട്ടുവെച്ചത്. പതാകകൾ ഐക്യത്തിൻ്റെ അടയാളമാകണമെന്നും ഒരു പതാകയ്ക്ക് കീഴിൽ നഗരം ഒന്നിക്കണമെന്നും അദ്ദേഹം പറഞ്ഞു. നേരത്തെ പതാക ഉയർത്തുന്നതുമായി ബന്ധപ്പെട്ടുണ്ടായ തർക്കങ്ങളെത്തുടർന്നാണ് ഈ തീരുമാനം. അടുത്തിടെ ഫലസ്തീൻ പതാക ഉയർത്തിയതുമായി ബന്ധപ്പെട്ട് വലിയ വിവാദങ്ങൾ ഉണ്ടായിരുന്നു. വിദേശ പതാകകൾ നഗരത്തിൽ ഭിന്നതയുണ്ടാക്കുമെന്ന് ചില കൗൺസിലർമാർ വാദിച്ചു. എന്നാൽ, ഈ നിരോധനം പല കമ്മ്യൂണിറ്റികളോടും ചെയ്യുന്ന അനീതിയാണെന്ന് എതിർത്തവർ ചൂണ്ടിക്കാട്ടി.

ഏകദേശം 160 രാജ്യങ്ങളെ ഈ നിയമം പ്രതികൂലമായി ബാധിക്കുമെന്ന് കൗൺസിലർ നിക്ക് മാൻ്റസ് പറഞ്ഞു. വൈവിധ്യങ്ങളെ നിയന്ത്രിക്കുന്നതിന് പകരം അത് ആഘോഷിക്കുകയാണ് വേണ്ടതെന്നും അദ്ദേഹം വാദിച്ചു. എന്നാൽ, കാനഡയുടെ പതാക മാത്രം ഔദ്യോഗിക കെട്ടിടങ്ങളിൽ മതിയെന്നാണ് അനുകൂലിക്കുന്നവരുടെ പക്ഷം. ഇത് ദേശീയ ഐക്യത്തോടുള്ള ആദരവാണെന്ന് അവർ വിശ്വസിക്കുന്നു. ഈ തീരുമാനം ടൊറന്റോയുടെ സാംസ്കാരിക വൈവിധ്യത്തെ ബാധിക്കുമെന്ന് എതിർക്കുന്നവർ ആശങ്കപ്പെടുന്നു. നഗരത്തിൻ്റെ വൈവിധ്യത്തെ ആദരിക്കാനുള്ള വഴിയായിരുന്നു പതാകകൾ ഉയർത്തുന്ന ചടങ്ങുകൾ എന്ന് അവർ ഓർമ്മിപ്പിച്ചു.