ഗാറ്റിനോ ആശുപത്രിയിലെ ചികിത്സാപിഴവ്: ആസ്ത്മ ബാധിച്ച് നാലുവയസ്സുകാരി മരിച്ച സംഭവത്തിൽ അന്വേഷണം

          

കാനഡയിലെ ഗാറ്റിനോ ആശുപത്രിയിൽ ആസ്ത്മയ്ക്ക് ചികിത്സ തേടിയ നാലുവയസ്സുകാരി ക്ലോയി ബെലാഞ്ചർ  മരിച്ച സംഭവത്തിൽ ആരോഗ്യവകുപ്പ് അന്വേഷണം പ്രഖ്യാപിച്ചു. കടുത്ത ആസ്ത്മ ബാധയെത്തുടർന്ന് മാർച്ച് 13-ന് ആശുപത്രിയിൽ പ്രവേശിപ്പിക്കപ്പെട്ട കുട്ടിയുടെ ചികിത്സയിൽ ഗുരുതരമായ വീഴ്ചയുണ്ടായെന്ന മാതാപിതാക്കളുടെ പരാതിയെത്തുടർന്നാണ്  CISSSO അന്വേഷണം ആരംഭിച്ചത്.

ശ്വാസതടസ്സം നേരിട്ട കുട്ടിയെ ശ്വസന സഹായികൾ നൽകിയ ശേഷം മണിക്കൂറുകളോളം പരിചരണമില്ലാതെ മാറ്റിയിരുത്തിയെന്നും, കൃത്യസമയത്ത് വിദഗ്ധ ചികിത്സ ലഭ്യമാക്കിയില്ലെന്നുമാണ് കുടുംബത്തിൻ്റെ ആരോപണം.
ആശുപത്രിയിൽ എത്തി മൂന്ന് മണിക്കൂറിന് ശേഷം കുട്ടിക്ക് ഹൃദയസ്തംഭനം (Cardio-respiratory arrest) ഉണ്ടാവുകയും, തുടർന്ന് ഒട്ടാവയിലെ സി.എച്ച്.ഇ.ഒ (CHEO) കുട്ടികളുടെ ആശുപത്രിയിലേക്ക് മാറ്റുകയും ചെയ്തെങ്കിലും മാർച്ച് 17-ന് മരണം സംഭവിക്കുകയായിരുന്നു. മുൻപ് പലതവണ വൈറസ് ബാധകളെത്തുടർന്ന് ശ്വാസകോശം ദുർബലമായിരുന്ന കുട്ടിക്ക് മതിയായ മാനുഷിക പരിഗണനയോ പരിചരണമോ ലഭിച്ചില്ലെന്ന് മാതാവ് അലക്സാന്ദ്ര ഡെസ്ജാർഡിൻസ്-ഗൺവിൽ ആരോപിച്ചു. സംഭവത്തിൽ ഒൻ്റാരിയോ കൊറോണർ ഓഫീസും സമാന്തരമായി അന്വേഷണം നടത്തുന്നുണ്ട്. കുടുംബത്തിൻ്റെ സ്വകാര്യത കണക്കിലെടുത്ത് കൂടുതൽ പ്രതികരണങ്ങൾക്കില്ലെന്ന് അറിയിച്ച അധികൃതർ, സംഭവത്തെ അതീവ ഗൗരവത്തോടെയാണ് കാണുന്നതെന്ന് വ്യക്തമാക്കി.