കാനഡയിൽ പ്രമുഖ ബ്രാൻഡുകളുടെ പാലുകൾ തിരിച്ചുവിളിക്കുന്നു: കുപ്പിച്ചില്ലിൻ്റെ സാന്നിധ്യം കണ്ടെത്തിയതായി റിപ്പോർട്ട്

പ്രമുഖ പാൽ ഉൽപ്പന്ന ബ്രാൻഡുകളായ ഫാർമേഴ്‌സ് , നാട്രൽ, ക്യുബെൻ എന്നിവയുടെ ചില ഉൽപ്പന്നങ്ങൾ വിപണിയിൽ നിന്ന് അടിയന്തരമായി പിൻവലിക്കുന്നു. പാലിനുള്ളിൽ കുപ്പിച്ചില്ലിൻ്റെ അവശിഷ്ടങ്ങൾ  കാണപ്പെടാൻ സാധ്യതയുണ്ടെന്ന കണ്ടെത്തലിനെ തുടർന്നാണ് ഈ നടപടി. കാനഡയിലെ ഏറ്റവും വലിയ ഡയറി സഹകരണ സംഘമായ 'അഗ്രോപുർ'  ബുധനാഴ്ചയാണ് ഈ സുരക്ഷാ മുന്നറിയിപ്പ് നൽകിയത്. ഉപഭോക്താക്കളുടെ സുരക്ഷ മുൻനിർത്തി സ്വമേധയാ ആണ് കമ്പനി ഉൽപ്പന്നങ്ങൾ തിരിച്ചുവിളിക്കാൻ തീരുമാനിച്ചത്.

നിലവിൽ കനേഡിയൻ ഫുഡ് ഇൻസ്പെക്ഷൻ ഏജൻസി ഈ വിഷയത്തിൽ വിശദമായ ഭക്ഷ്യ സുരക്ഷാ അന്വേഷണം നടത്തിവരികയാണ്. നോവ സ്കോഷ്യ, പ്രിൻസ് എഡ്വേർഡ് ഐലൻഡ് എന്നിവിടങ്ങളിൽ വിതരണം ചെയ്ത ഫാർമേഴ്‌സ് ബ്രാൻഡിൻ്റെ വിവിധ പാൽ ഉൽപ്പന്നങ്ങളും, ക്യുബെക്കിലെ ക്യുബെൻ ചോക്ലേറ്റ് മിൽക്കും ഇതിൽ ഉൾപ്പെടുന്നു. കൂടാതെ, രാജ്യം മുഴുവൻ വിതരണം ചെയ്യുന്ന നാട്രൽ ബ്രാൻഡിൻ്റെ രണ്ട് ലിറ്റർ ലാക്ടോസ് ഫ്രീ ചോക്ലേറ്റ് മിൽക്കിനും ഈ മുന്നറിയിപ്പ് ബാധകമാണ്. വിപണിയിൽ നിന്ന് ഈ ഉൽപ്പന്നങ്ങൾ പൂർണ്ണമായും നീക്കം ചെയ്യുന്നുണ്ടെന്ന് ഉറപ്പുവരുത്താൻ കർശനമായ പരിശോധനകൾ നടന്നുവരികയാണെന്ന് അധികൃതർ അറിയിച്ചു.