മോഷണവാഹനവുമായി രക്ഷപ്പെട്ട കൗമാരക്കാരനെ പിടികൂടി; ഓഫീസര് ജോജി എബ്രഹാമിന് 'ഓഫീസര് ഓഫ് ദ മന്ത്' ബഹുമതി
By: 600002 On: Mar 25, 2026, 12:51 PM
ജീമോന് റാന്നി
ഫിലഡല്ഫിയ: നഗരത്തില് നടന്ന സാഹസിക പിന്തുടര്ച്ചയില് മോഷണവാഹനവുമായി രക്ഷപ്പെടാന് ശ്രമിച്ച 16-കാരനെ പോലീസ് പിടികൂടി. ഈ സംഭവത്തില് ധൈര്യവും ജാഗ്രതയും പ്രകടിപ്പിച്ച ഓഫീസര് ജോജി എബ്രഹാം (#1348) ഫെബ്രുവരി 2026-ലെ ''പോലീസ് ഓഫീസര് ഓഫ് ദ മന്ത്'' ആയി തിരഞ്ഞെടുത്തു. കഴിഞ്ഞ 10 വര്ഷമായി ഫിലഡല്ഫിയ സിറ്റി പോലീസ് വകുപ്പില് സേവനമനുഷ്ഠിച്ചു വരുന്ന ഉദ്യോഗസ്ഥനാണ് മലയാളിയായ ജോജി എബ്രഹാം.
ഫെബ്രുവരി 12-ന് വൈകുന്നേരം 4:09ഓടെ, ബക്സ് കൗണ്ടി പോലീസ് നല്കിയ വിവരത്തിന്റെ അടിസ്ഥാനത്തില് 11000 ബസ്റ്റില്ടണ് അവന്യൂ പ്രദേശത്തേക്ക് എത്തിയ ഓഫീസര് എബ്രഹാം, അപകടത്തില്പ്പെട്ട ശേഷം രക്ഷപ്പെട്ടതായി സംശയിക്കുന്ന ഹ്യുണ്ടായി എലാന്ട്ര വാഹനത്തെ ശ്രദ്ധയില്പ്പെടുത്തി. വാഹനം തിരിച്ചറിഞ്ഞതിന് പിന്നാലെ ഡ്രൈവര് അതിവേഗത്തില് ട്രാഫിക്കിലൂടെ അപകടകരമായി സഞ്ചരിക്കാന് തുടങ്ങി.
സ്ഥിതിഗതികള് നിയന്ത്രണവിധേയമാക്കാന് ഓഫീസര് ഉടന് പോലീസ് റേഡിയോ വഴി വിവരങ്ങള് കൈമാറി. തുടര്ന്ന് 10000 ബ്ലോക്കില് വാഹനം വീണ്ടും അപകടത്തില്പ്പെട്ടതോടെ, 16-കാരന് വാഹനത്തില് നിന്ന് ഇറങ്ങി ഓടി രക്ഷപ്പെടാന് ശ്രമിച്ചു. എന്നാല് ഓഫീസര് എബ്രഹാം കാല്നടയായി പിന്തുടര്ന്ന് നിര്ത്താന് നിര്ദ്ദേശം നല്കിയപ്പോള് പ്രതി കീഴടങ്ങി.
പരിശോധനയില് വാഹനം ഫെബ്രുവരി 9-ന് മോഷണം പോയതാണെന്ന് സ്ഥിരീകരിച്ചു. തുടര്ന്ന് പ്രതിയെ ലോവര് സൗത്താംപ്ടണ് പോലീസ് ഡിപ്പാര്ട്മെന്റിന്റെ കസ്റ്റഡിയിലേക്ക് കൈമാറി.
സാഹസികവും ഉത്തരവാദിത്തപരവുമായ ഇടപെടലിലൂടെ പൊതുസുരക്ഷ ഉറപ്പാക്കിയ ഓഫീസര് ജോജി എബ്രഹാമിന്റെ പ്രവര്ത്തനം വ്യാപകമായി പ്രശംസിക്കപ്പെടുകയാണ്.