കാൽഗറി സിറ്റി ഹാളുമായി ബന്ധപ്പെട്ട അഴിമതി ആരോപണങ്ങളിൽ മുൻ മേയറുടെയും കൗൺസിലർമാരുടെയും വീടുകളിൽ ആർ.സി.എം.പിയുടെ പരിശോധന

കാനഡയിലെ കാൽഗറി സിറ്റി ഹാളുമായി ബന്ധപ്പെട്ട അഴിമതി ആരോപണങ്ങളിൽ മുൻ മേയർ ഉൾപ്പെടെയുള്ള പ്രമുഖർക്കെതിരെ അന്വേഷണം കടുപ്പിച്ച് ആർ.സി.എം.പി. ഇതിൻ്റെ ഭാഗമായി മുൻ മേയർ ജ്യോതി ഗോണ്ടെക്, മുൻ കൗൺസിലർ ഷോൺ ചു, നിലവിലെ കൗൺസിലർ ആന്ദ്രേ ചാബോട്ട് എന്നിവരുടെ വീടുകളിൽ പോലീസ് മിന്നൽ പരിശോധന നടത്തി.  പരിശോധനയ്ക്കിടെ ഇവരുടെ മൊബൈൽ ഫോണുകളും മറ്റ് ഇലക്ട്രോണിക് ഉപകരണങ്ങളും പോലീസ് പിടിച്ചെടുത്തിട്ടുണ്ട്. നഗരത്തിലെ ഒരു പ്രാദേശിക ബിസിനസ് സ്ഥാപനത്തിലും സെർച്ച് വാറണ്ട് പ്രകാരം പോലീസ് പരിശോധന നടത്തി.

2025 ഒക്ടോബറിൽ ലഭിച്ച ഒരു പരാതിയുടെ അടിസ്ഥാനത്തിലാണ് കാൽഗറി പോലീസ് ഈ കേസ് ആർ.സി.എം.പിക്ക് കൈമാറിയത്. രാഷ്ട്രീയക്കാരുമായി ബന്ധപ്പെട്ട കുറ്റകൃത്യങ്ങൾ അന്വേഷിക്കുന്ന ആർ.സി.എം.പിയുടെ പ്രത്യേക യൂണിറ്റായ 'ഫെഡറൽ പോലീസിംഗ് നോർത്ത് വെസ്റ്റ് റീജിയൻ' ആണ് നിലവിൽ ഈ കേസ് കൈകാര്യം ചെയ്യുന്നത്. അന്വേഷണം പ്രാഥമിക ഘട്ടത്തിലായതിനാൽ നിലവിൽ ആർക്കെതിരെയും കുറ്റപത്രം സമർപ്പിച്ചിട്ടില്ല. അന്വേഷണത്തിൻ്റെ സുതാര്യത ഉറപ്പാക്കാൻ കൂടുതൽ വിവരങ്ങൾ ഇപ്പോൾ പുറത്തുവിടാനാകില്ലെന്ന് പോലീസ് വക്താവ് അറിയിച്ചു.

അന്വേഷണത്തോട് പൂർണ്ണമായി സഹകരിക്കുന്നുണ്ടെന്നും എന്നാൽ വീട്ടിൽ നടന്ന പരിശോധന അല്പം അസ്വസ്ഥതയുണ്ടാക്കിയെന്നും മുൻ മേയർ ജ്യോതി ഗോണ്ടെക് സ്ഥിരീകരിച്ചു. പരിശോധന നിയമപരമാണോ എന്ന് തൻ്റെ അഭിഭാഷകൻ വഴി പരിശോധിക്കുമെന്നും അവർ കൂട്ടിച്ചേർത്തു.