കാനഡയിൽ ഇന്ത്യൻ വിദ്യാർത്ഥി വെടിയേറ്റു മരിച്ച സംഭവം: 18-കാരനെതിരെ കൊലക്കുറ്റം ചുമത്തി

എഡ്മണ്ടൻ ഹൈവേയിലുണ്ടായ വെടിവെപ്പിൽ ഇന്ത്യൻ വിദ്യാർത്ഥിയായ ബിരീന്ദർ സിംഗ് കൊല്ലപ്പെട്ട സംഭവത്തിൽ 18-കാരനായ ജിമ്മി ഗാസ്നറെ പോലീസ് അറസ്റ്റ് ചെയ്തു. ലോയ്ഡ്മിൻസ്റ്റർ സ്വദേശിയായ ഇയാൾക്കെതിരെ രണ്ടാം ഡിഗ്രി കൊലക്കുറ്റമാണ് ചുമത്തിയിരിക്കുന്നത്. മാർച്ച് 14-ന്  ഹൈവേയിലൂടെ സുഹൃത്തുക്കളോടൊപ്പം കാറിൽ സഞ്ചരിക്കുകയായിരുന്ന ബിരീന്ദറിന് നേരെ തൊട്ടടുത്തുകൂടി പോയ പിക്കപ്പ് ട്രക്കിൽ നിന്ന് വെടിയേൽക്കുകയായിരുന്നു. സസ്‌കാച്ചവാനിലെ കാനോ ലേക്കിന് സമീപത്തുനിന്നാണ് പ്രതിയെ RCMP പിടികൂടിയത്. കേസിൽ കൂടുതൽ അന്വേഷണം നടന്നുവരികയാണെന്നും പ്രതിയെ ഉടൻ കോടതിയിൽ ഹാജരാക്കുമെന്നും പോലീസ് അറിയിച്ചു.

മൂന്ന് വർഷം മുമ്പ് കാനഡയിലെത്തിയ ബിരീന്ദർ സിംഗ് ഒരു കടുത്ത സിഖ് മതവിശ്വാസിയായിരുന്നു. യാതൊരു പ്രകോപനവുമില്ലാതെ നടന്ന ഈ ആക്രമണം വംശീയ വിദ്വേഷത്തെത്തുടർന്നുള്ളതാണോ  എന്ന് അന്വേഷിക്കണമെന്ന് വേൾഡ് സിഖ് ഓർഗനൈസേഷൻ ഓഫ് കാനഡ പോലീസിനോട് ആവശ്യപ്പെട്ടിട്ടുണ്ട്. കാനഡയിൽ സിഖ് വംശജർക്കെതിരായ വിദ്വേഷ പ്രചാരണങ്ങൾ വർദ്ധിച്ചുവരുന്ന സാഹചര്യത്തിൽ ഈ കൊലപാതകത്തിന് പിന്നിലെ യഥാർത്ഥ ലക്ഷ്യം വ്യക്തമാക്കണമെന്നാണ് സിഖ് സംഘടനകളുടെയും ബിരീന്ദറിൻ്റെ സുഹൃത്തുക്കളുടെയും ആവശ്യം. എന്നാൽ, കൊലപാതകത്തിൻ്റെ കാരണം ഇപ്പോഴും വ്യക്തമല്ലെന്നും അന്വേഷണം പുരോഗമിക്കുകയാണെന്നും പൊലീസ് വ്യക്തമാക്കി.