മോഷണം പോയ ട്രക്ക് വിറ്റ സംഭവം: ആൽബർട്ടയിലെ കുടുംബത്തിന് ഡീലർഷിപ്പിൽ നിന്ന് 40,000 ഡോളർ തിരികെ ലഭിച്ചു

ആൽബർട്ടയിലെ അംഗീകൃത ഡീലർഷിപ്പിൽ നിന്ന് വാങ്ങിയ പുതിയ ട്രക്ക് മോഷണമുതലാണെന്ന് കണ്ടെത്തി പോലീസ് പിടിച്ചെടുത്തതിനെത്തുടർന്ന് ദുരിതത്തിലായ  കുടുംബത്തിന് ഒടുവിൽ നീതി ലഭിച്ചു. പോണോക്കയിലെ സമിറ്റ് റാം (Summit Ram) എന്ന ഡീലർഷിപ്പിൽ നിന്ന് അശുതോഷ് പഥക്കും സഹോദരനും ചേർന്ന് ഏകദേശം 40,000 ഡോളർ നൽകി വാങ്ങിയ ഫോർഡ് F-150 ട്രക്കാണ് ഒരു മാസത്തെ ഉപയോഗത്തിന് ശേഷം റോയൽ കനേഡിയൻ മൗണ്ടഡ് പോലീസ്  പിടിച്ചെടുത്തത്. വാഹനത്തിൻ്റെ ഐഡൻ്റിഫിക്കേഷൻ നമ്പർ  വ്യാജമാണെന്നും വാഹനം മോഷ്ടിക്കപ്പെട്ടതാണെന്നും പരിശോധനയിൽ തെളിഞ്ഞു. ഡീലർഷിപ്പ് വഴി നിയമപരമായ എല്ലാ നടപടികളും പാലിച്ചാണ് വാഹനം വാങ്ങിയതെങ്കിലും, പണമോ വാഹനമോ ഇല്ലാതെ മാസങ്ങളോളം ഈ കുടുംബം പ്രതിസന്ധിയിലായിരുന്നു.

ഇൻഷുറൻസ് കമ്പനിയും ഡീലർഷിപ്പും സഹായം നിഷേധിച്ചതിനെത്തുടർന്ന് അശുതോഷ് പഥക് ഗ്ലോബൽ ന്യൂസിനെ സമീപിക്കുകയും വാർത്ത പുറത്തുവരികയും ചെയ്തതോടെയാണ് സംഭവത്തിൽ മാറ്റമുണ്ടായത്. വാർത്ത വന്ന് ദിവസങ്ങൾക്കുള്ളിൽ തന്നെ ഡീലർഷിപ്പ് അധികൃതർ കുടുംബത്തിന് പണം തിരികെ നൽകാൻ തയ്യാറായി. കാനഡയിൽ ഇത്തരത്തിൽ വാഹനങ്ങളുടെ ഐഡൻ്റിഫിക്കേഷൻ നമ്പറുകൾ മാറ്റി മറിച്ചുള്ള തട്ടിപ്പുകൾ (re-VINning) വർദ്ധിച്ചുവരികയാണെന്ന് പോലീസ് മുന്നറിയിപ്പ് നൽകുന്നു. അംഗീകൃത ഡീലർമാരെപ്പോലും കബളിപ്പിക്കാൻ കഴിയുന്ന തരത്തിൽ അത്യാധുനിക സാങ്കേതികവിദ്യ ഉപയോഗിച്ചാണ് ഇത്തരം മാഫിയകൾ പ്രവർത്തിക്കുന്നത്. എങ്കിലും, ഒരു ഉപഭോക്താവ് എന്ന നിലയിൽ താൻ നേരിട്ട മാനസിക വിഷമത്തിനും കാലതാമസത്തിനും ഡീലർഷിപ്പ് മറുപടി പറയേണ്ടതുണ്ടെന്ന് പഥക് പ്രതികരിച്ചു.