ഹെഡ്‌ലൈറ്റുകളുടെ അമിത പ്രകാശം ഡ്രൈവർമാരെ വലയ്ക്കുന്നു; ദേശീയ സർവേ ആരംഭിച്ച് ട്രാൻസ്‌പോർട്ട് കാനഡ

രാത്രികാലങ്ങളിൽ എതിരെ വരുന്ന വാഹനങ്ങളുടെ ഹെഡ്‌ലൈറ്റിൻ്റെ അമിത പ്രകാശം കാഴ്ച മറയ്ക്കുന്നുവെന്ന പരാതികൾ വർദ്ധിക്കുന്ന സാഹചര്യത്തിൽ, ട്രാൻസ്‌പോർട്ട് കാനഡ പൊതുജനങ്ങളിൽ നിന്ന് അഭിപ്രായം തേടുന്നു.   മാർച്ച് ആറിന് ആരംഭിച്ച ഈ ദേശീയ സർവേ 2026 ഏപ്രിൽ 20 വരെ തുടരും. പുതിയ വാഹനങ്ങളിലെ എൽഇഡി ലൈറ്റുകൾ ഡ്രൈവർമാരുടെ കാഴ്ചയെ ദോഷകരമായി ബാധിക്കുന്നുവെന്ന വ്യാപക പരാതിയെത്തുടർന്നാണ് ഈ നടപടി.

പലപ്പോഴും ലോ-ബീം ലൈറ്റുകൾക്ക് പോലും എതിരെ വരുന്നവരെ താൽക്കാലികമായി അന്ധരാക്കുന്ന (Blinding effect) അവസ്ഥയുണ്ടെന്ന് ഡ്രൈവർമാർ ചൂണ്ടിക്കാട്ടുന്നു. ഈ വിഷയത്തിൽ ഫെഡറൽ സർക്കാർ അടിയന്തരമായി ഇടപെടണമെന്ന് വാൻകൂവർ സിറ്റി കൗൺസിൽ ഉൾപ്പെടെ പ്രമേയത്തിലൂടെ ആവശ്യപ്പെട്ടിരുന്നു. എസ്‌യുവി (SUV) പോലുള്ള വലിയ വാഹനങ്ങളുടെ ലൈറ്റുകളുടെ ഉയരവും, കൃത്യമല്ലാത്ത ക്രമീകരണങ്ങളും പ്രശ്നം കൂടുതൽ സങ്കീർണ്ണമാക്കുന്നുണ്ട്.

നിലവിൽ കാനഡയിലെയും അമേരിക്കയിലെയും നിയമങ്ങൾ ഡ്രൈവർമാരുടെ കാഴ്ചയ്ക്കാണ് മുൻഗണന നൽകുന്നത്. എന്നാൽ, മറ്റ് രാജ്യങ്ങളിലെ പോലെ എതിരെ വരുന്നവരുടെ സുരക്ഷ കൂടി പരിഗണിക്കുന്ന കർശനമായ മാനദണ്ഡങ്ങൾ ഇവിടെയും വേണമെന്ന ആവശ്യം ശക്തമാണ്. സർവേയിലൂടെ ലഭിക്കുന്ന വിവരങ്ങളുടെ അടിസ്ഥാനത്തിൽ ഭാവിയിൽ ഹെഡ്‌ലൈറ്റുകളുടെ തീവ്രതയും ഡിസൈനും സംബന്ധിച്ച പുതിയ സുരക്ഷാ നയങ്ങൾ രൂപീകരിക്കാനാണ് അധികൃതരുടെ തീരുമാനം. താഴെ പറയുന്ന ലിങ്കിൽ ക്ലിക്ക് ചെയ്ത് സർവേയിൽ പങ്കെടുക്കാവുന്നതാണ്. https://www.surveymonkey.ca/r/F9WBTLZ