വിദേശ തൊഴിലാളി നയത്തിൽ ഭിന്നത: കേന്ദ്ര നീക്കത്തെ എതിർത്ത് ബി.സി. പ്രീമിയർ

ഗ്രാമീണ മേഖലകളിൽ താൽക്കാലിക വിദേശ തൊഴിലാളികളെ നിയമിക്കാനുള്ള ഫെഡറൽ സർക്കാരിൻ്റെ നീക്കത്തിനെതിരെ കടുത്ത വിയോജിപ്പുമായി ബ്രിട്ടീഷ് കൊളംബിയ പ്രീമിയർ ഡേവിഡ് എബി. തൊഴിലാളികൾക്ക് താൽക്കാലിക പെർമിറ്റുകൾക്ക് പകരം സ്ഥിരതാമസത്തിനുള്ള അവസരമാണ് നൽകേണ്ടതെന്ന് അദ്ദേഹം വ്യക്തമാക്കി. എന്നാൽ, തൊഴിലാളി ക്ഷാമം രൂക്ഷമായ സൺഷൈൻ കോസ്റ്റ് പോലുള്ള മേഖലകളിലെ പ്രാദേശിക നേതാക്കൾ ഫെഡറൽ സർക്കാരിൻ്റെ നീക്കത്തിന് അനുകൂല നിലപാടാണ് സ്വീകരിച്ചിട്ടുള്ളത്.

ഫെഡറൽ സർക്കാർ പ്രഖ്യാപിച്ച പുതിയ മാറ്റങ്ങൾ പ്രകാരം ഗ്രാമീണ മേഖലകളിലെ തൊഴിലുടമകൾക്ക് തങ്ങളുടെ ആകെ ജീവനക്കാരുടെ 15 ശതമാനം വരെ കുറഞ്ഞ വേതനമുള്ള വിദേശ തൊഴിലാളികളെ നിയമിക്കാനാകും. നേരത്തെ ഇത് 10 ശതമാനമായിരുന്നു. കൂടാതെ, നിലവിലുള്ള തൊഴിലാളികൾക്ക് ഒരു വർഷത്തെ പെർമിറ്റ് കാലാവധി കൂടി നീട്ടി നൽകാനും തീരുമാനമായിട്ടുണ്ട്. എന്നാൽ ഈ ആനുകൂല്യങ്ങൾ 2027 മാർച്ച് വരെ മാത്രമേ നിലവിലുണ്ടാകൂ.

താൽക്കാലിക വിദേശ തൊഴിലാളി പദ്ധതി വിപുലീകരിക്കുന്നത് ഗുണകരമാകില്ലെന്നാണ് ഡേവിഡ് എബിയുടെ നിലപാട്. ഈ പദ്ധതി തൊഴിലാളികളെ തൊഴിലുടമകളുടെ നിബന്ധനകൾക്ക് കീഴിലാക്കുന്നുവെന്നും അവരെ ചൂഷണങ്ങൾക്ക് വിധേയരാക്കുന്നുവെന്നും അദ്ദേഹം ആരോപിച്ചു. വിദ്യാഭ്യാസം, ചൈൽഡ് കെയർ, നൈപുണ്യ മേഖലകൾ എന്നിവയിലെ തൊഴിലാളി ക്ഷാമം പരിഹരിക്കാൻ ഈ മാറ്റങ്ങൾ ഉപകരിക്കില്ലെന്നും പെർമിറ്റ് കാലാവധി കഴിയുമ്പോൾ തൊഴിലാളികൾ നാടുകടത്തൽ ഭീഷണി നേരിടുമെന്നും അദ്ദേഹം ചൂണ്ടിക്കാട്ടി.

അതേസമയം, പ്രീമിയറുടെ നിലപാടിനോട് സീഷെൽറ്റ് മേയർ ജോൺ ഹെൻഡേഴ്സൺ വിയോജിച്ചു. തൻ്റെ കമ്മ്യൂണിറ്റി കടുത്ത തൊഴിലാളി ക്ഷാമത്തിലൂടെയാണ് കടന്നുപോകുന്നതെന്നും ഫെഡറൽ സർക്കാർ മുന്നോട്ടുവെച്ച ഈ നിർദ്ദേശങ്ങൾ പ്രവിശ്യാ സർക്കാർ അംഗീകരിക്കണമെന്നും അദ്ദേഹം ആവശ്യപ്പെട്ടു. എങ്കിലും, 2027-ന് ശേഷമുള്ള കാര്യങ്ങളിൽ വ്യക്തത വരുത്താത്തതിൽ അദ്ദേഹം ഫെഡറൽ സർക്കാരിനെ വിമർശിച്ചു. കൃത്യമായ നയമില്ലാതെ കുടുംബങ്ങൾക്കും ബിസിനസുകൾക്കും മുന്നോട്ട് പോകാൻ പ്രയാസമാണെന്നും അദ്ദേഹം പറഞ്ഞു.