വെനസ്വേല യുഎസ് എംബസിയില് വീണ്ടും അമേരിക്കന് പതാക ഉയര്ന്നു; 2019-ന് ശേഷം ആദ്യം
By: 600002 On: Mar 18, 2026, 6:39 AM
പി പി ചെറിയാന്
വാഷിംഗ്ടണ് ഡി സി: നീണ്ട ഏഴ് വര്ഷത്തെ ഇടവേളയ്ക്ക് ശേഷം വെനസ്വേലയിലെ കാരക്കാസിലുള്ള അമേരിക്കന് എംബസിയില് ശനിയാഴ്ച വീണ്ടും യുഎസ് പതാക ഉയര്ത്തി. 2019-ല് നയതന്ത്രബന്ധം വഷളായതിനെത്തുടര്ന്ന് താഴ്ത്തിയ പതാകയാണ് ഇപ്പോള് വീണ്ടും ഉയര്ത്തിയത്.
കഴിഞ്ഞ ജനുവരിയില് വെനസ്വേലന് പ്രസിഡന്റായിരുന്ന നിക്കോളാസ് മഡുറോയെ അമേരിക്കന് സൈന്യം പിടികൂടിയതിനെത്തുടര്ന്ന് ഇരുരാജ്യങ്ങളും തമ്മിലുള്ള ബന്ധത്തില് വലിയ മാറ്റങ്ങള് വന്നിരുന്നു.
നിലവിലെ ആക്ടിംഗ് പ്രസിഡന്റ് ഡെല്സി റോഡ്രിഗസ് അമേരിക്കയുമായി ചര്ച്ചകള്ക്ക് തയ്യാറായതും അമേരിക്കന് പ്രസിഡന്റ് ഡൊണാള്ഡ് ട്രംപ് അവര്ക്ക് പിന്തുണ പ്രഖ്യാപിച്ചതുമാണ് എംബസി തുറക്കുന്നതിലേക്ക് നയിച്ചത്.
എംബസിയില് പതാക ഉയര്ന്നത് കാരക്കാസിലെ പ്രാദേശിക നിവാസികള്ക്കിടയില് വലിയ സന്തോഷമുണ്ടാക്കി. ഇത് പുരോഗതിയുടെയും ലോകരാജ്യങ്ങളുമായുള്ള നല്ല ബന്ധത്തിന്റെയും തുടക്കമാണെന്ന് പലരും പ്രതികരിച്ചു.
പതാക ഉയര്ത്തിയെങ്കിലും എംബസി കെട്ടിടത്തില് നിലവില് അറ്റകുറ്റപ്പണികള് നടക്കുകയാണ്. എംബസി എന്ന് മുതല് പൂര്ണ്ണതോതില് പ്രവര്ത്തനം ആരംഭിക്കുമെന്ന് വ്യക്തമല്ല.
അതേസമയം, നിക്കോളാസ് മഡുറോയെ നിര്ബന്ധപൂര്വ്വം അധികാരത്തില് നിന്ന് നീക്കിയതിലും അദ്ദേഹത്തെയും ഭാര്യയെയും ന്യൂയോര്ക്കില് ജയിലിലടച്ചതിലും വെനസ്വേലയിലെ ഒരു വിഭാഗം രാഷ്ട്രീയക്കാര്ക്കും ജനങ്ങള്ക്കും ട്രംപ് ഭരണകൂടത്തോട് കടുത്ത എതിര്പ്പുണ്ട്. രാജ്യത്തെ എണ്ണ വ്യവസായത്തില് അമേരിക്കന് സ്വാധീനം വര്ദ്ധിക്കുന്നതിനെയും ഇവര് വിമര്ശിക്കുന്നു.