കാനഡയിലെ അത്യാഹിത വിഭാഗങ്ങളിൽ കടുത്ത പ്രതിസന്ധി: ചികിത്സ കിട്ടാതെ മരിക്കുന്നത് ആയിരങ്ങൾ

കാനഡയിലെ ആശുപത്രികൾ നേരിടുന്ന കടുത്ത തിരക്കും അത്യാഹിത വിഭാഗങ്ങളിലെ (ER) അമിതഭാരവും മൂലം പ്രതിവർഷം ആയിരക്കണക്കിന് ആളുകൾക്ക് ജീവൻ നഷ്ടമാകുന്നതായി ഡോക്ടർമാരുടെ മുന്നറിയിപ്പ്. ഒഴിവാക്കാവുന്ന മരണങ്ങൾ പോലും ചികിത്സാ കാലതാമസം മൂലം സംഭവിക്കുന്നത് രാജ്യത്തെ ആരോഗ്യരംഗത്തെ  ദുരന്താവസ്ഥ'യിലേക്കാണ്  എത്തിച്ചിരിക്കുന്നതെന്ന് വിദഗ്ധർ ചൂണ്ടിക്കാട്ടുന്നു.

ഒരു ഡോക്ടറെ കാണാൻ പോലും രോഗികൾക്ക് മണിക്കൂറുകളോളം കാത്തിരിക്കേണ്ടി വരുന്ന സാഹചര്യത്തെ ഒരു 'മറഞ്ഞിരിക്കുന്ന പകർച്ചവ്യാധി' എന്നാണ് മെഡിക്കൽ റിപ്പോർട്ടുകൾ വിശേഷിപ്പിക്കുന്നത്. ഹൃദ്രോഗം, ഗുരുതരമായ അണുബാധകൾ എന്നിവയുമായി എത്തുന്നവർ പോലും പരിചരണം ലഭിക്കാതെ വെയ്റ്റിംഗ് റൂമുകളിൽ കിടന്ന് മരിക്കുന്നത് ഇപ്പോൾ ഒറ്റപ്പെട്ട സംഭവങ്ങളല്ല.

കണക്കുകൾ പ്രകാരം പ്രതിവർഷം 8,000 മുതൽ 15,000 വരെ കനേഡിയൻ പൗരന്മാരാണ് ചികിത്സാ സൗകര്യങ്ങളുടെ അഭാവം മൂലം അനാവശ്യമായി മരണത്തിന് കീഴടങ്ങുന്നത്. അത്യാഹിത വിഭാഗങ്ങൾ അവയുടെ പരമാവധി ശേഷിക്കും അപ്പുറത്താണ് ഇപ്പോൾ പ്രവർത്തിക്കുന്നത്. ആശുപത്രികളിൽ കിടക്കകൾ ഒഴിവില്ലാത്തതും, രോഗികളെ ഡിസ്ചാർജ് ചെയ്ത് മാറ്റാൻ മറ്റ് സംവിധാനങ്ങൾ ഇല്ലാത്തതുമാണ് പ്രതിസന്ധി രൂക്ഷമാക്കുന്നത്. അതിശക്തമായ വേദനയുമായി എത്തുന്നവർ പോലും 12 മണിക്കൂർ വരെ ചികിത്സ കിട്ടാതെ വലയുകയാണ്.

വികസിത രാജ്യങ്ങളിൽ ആശുപത്രി കിടക്കകളുടെ എണ്ണത്തിൽ ഏറ്റവും പിന്നിലാണ് കാനഡയെന്നതും ഈ തകർച്ചയ്ക്ക് ആക്കം കൂട്ടുന്നു. ഈ അവസ്ഥ തുടരുന്നത് ആരോഗ്യപ്രവർത്തകരുടെ മാനസിക സമ്മർദ്ദം വർദ്ധിപ്പിക്കുന്നതിനും ചികിത്സാ പിഴവുകൾക്കും കാരണമാകുന്നുണ്ട്. പ്രശ്നത്തിൽ ഫെഡറൽ ഗവൺമെൻ്റ് അടിയന്തരമായി ഇടപെടണമെന്നും ആരോഗ്യരംഗത്ത് അടിയന്തരാവസ്ഥ പ്രഖ്യാപിക്കണമെന്നുമാണ് ഡോക്ടർമാരുടെ ആവശ്യം.