അൽ-ഖുദ്‌സ് ദിന റാലി തടയാനുള്ള ഒൻ്റാരിയോ സർക്കാരിൻ്റെ നീക്കം പരാജയപ്പെട്ടു; പ്രതിഷേധ റാലി  ഇന്ന് 

ടൊറൻ്റോയിൽ നടത്താൻ നിശ്ചയിച്ചിരുന്ന  അൽ-ഖുദ്‌സ് ദിന റാലി തടയാൻ ഒൻ്റാരിയോ പ്രീമിയർ ഡഗ് ഫോർഡ് ഇൻജങ്‌ഷൻ ഉത്തരവ് തേടിയെങ്കിലും, റാലി നിശ്ചയിച്ച പ്രകാരം ഇന്ന് നടക്കുമെന്ന് സംഘാടകർ അറിയിച്ചു. പ്രീമിയർ ഫോർഡ് അറ്റോർണി ജനറൽ വഴി നിയമനടപടിക്ക് നിർദ്ദേശം നൽകിയെങ്കിലും, ഇത്തരമൊരു ഇൻജങ്‌ഷൻ നോട്ടീസ് ലഭിച്ചിട്ടില്ലെന്ന് സംഘാടകരുടെ അഭിഭാഷകൻ സ്റ്റീഫൻ എല്ലിസ് വ്യക്തമാക്കി. വിദ്വേഷവും അക്രമവും കാനഡയുടെ തെരുവുകളിൽ അനുവദിക്കില്ലെന്ന നിലപാടിലാണ് സർക്കാർ ഈ നീക്കം നടത്തിയത്. 1979-ൽ ഇറാൻ സ്ഥാപിച്ച അൽ-ഖുദ്‌സ് ദിനം പലസ്തീൻ ഐക്യദാർഢ്യത്തിനായാണ് ആചരിക്കുന്നത്. ഏകദേശം 3,000-ത്തോളം പേർ ഈ റാലിയിൽ പങ്കെടുക്കുമെന്നാണ് പ്രതീക്ഷിക്കുന്നത്.

അതേസമയം, പ്രതിഷേധം തുടങ്ങുന്നതിന് മുൻപ് തന്നെ അത് തടയാനുള്ള സർക്കാരിൻ്റെ നീക്കത്തിനെതിരെ കനേഡിയൻ സിവിൽ ലിബർട്ടീസ് അസോസിയേഷൻ (CCLA) രംഗത്തെത്തി. ഇത് പൗരന്മാരുടെ മൗലികാവകാശമായ ആവിഷ്‌കാര സ്വാതന്ത്ര്യത്തിന്മേലുള്ള കടന്നുകയറ്റമാണെന്ന് അവർ ചൂണ്ടിക്കാട്ടി. നഗരത്തിലെ സിനഗോഗുകൾക്കും കോൺസുലേറ്റിനും നേരെ അടുത്തിടെ നടന്ന അക്രമങ്ങളുടെ പശ്ചാത്തലത്തിൽ ടൊറൻ്റോ പോലീസ് സുരക്ഷ ശക്തമാക്കിയിട്ടുണ്ട്. സമാധാനപരമായി പ്രതിഷേധിക്കണമെന്ന് അധികൃതർ ജനങ്ങളോട് ആവശ്യപ്പെട്ടു. ടൊറൻ്റോയിലെ സാധാരണ ജനജീവിതം തടസ്സപ്പെടാതിരിക്കാനും സുരക്ഷ ഉറപ്പാക്കാനും ഡ്രോണുകൾക്ക് ഉൾപ്പെടെ കർശന നിരോധനം ഏർപ്പെടുത്തിയിട്ടുണ്ട്.