ടൊറൻ്റോ ഫുഡ് ബാങ്കിനുള്ള അരിയുമായി വന്ന കപ്പലിന് നേരെ ഹോർമുസ് കടലിടുക്കിൽ ആക്രമണം

 

തായ്ലൻഡിൽ നിന്ന് ടൊറൻ്റോയിലെ ഡെയ്‌ലി ബ്രെഡ് ഫുഡ് ബാങ്കിലേക്ക് ഏകദേശം 90,000 ഡോളർ വിലമതിക്കുന്ന അരിയുമായി പോയ കപ്പലിന് നേരെ ഹോർമുസ് കടലിടുക്കിൽ വെച്ച് ആക്രമണമുണ്ടായി.  മൂന്ന് ചരക്ക് കപ്പലുകൾക്ക് നേരെയാണ് ആക്രമണം ഉണ്ടായത്. ഏകദേശം 2,40,000 പൗണ്ട് അരി അടങ്ങിയ ആറ് കണ്ടെയ്‌നറുകളാണ് കപ്പലിൽ ഉണ്ടായിരുന്നത്. കപ്പൽ തകർന്നിട്ടില്ലെങ്കിലും ചരക്ക് നശിക്കാനോ അല്ലെങ്കിൽ വിതരണം വൈകാനോ സാധ്യതയുണ്ടെന്ന് ഫുഡ് ബാങ്ക് സിഇഒ നീൽ ഹെതറിംഗ്ടൺ ആശങ്ക പ്രകടിപ്പിച്ചു. ഏകദേശം 3,30,000 പേർക്ക് ഭക്ഷണം നൽകാൻ ആവശ്യമായ അരിയാണ് ഓരോ കണ്ടെയ്‌നറിലും ഉണ്ടായിരുന്നത്.

ചരക്ക് നീക്കം തടസ്സപ്പെട്ടെങ്കിലും നഗരത്തിലെ ജനങ്ങൾക്ക് ഭക്ഷണം നൽകുന്നതിൽ വീഴ്ച വരുത്തില്ലെന്ന് ഫുഡ് ബാങ്ക് അധികൃതർ വ്യക്തമാക്കി. ഇന്ത്യ, ഗയാന തുടങ്ങിയ രാജ്യങ്ങളിൽ നിന്ന് കൂടി അരി ശേഖരിക്കുന്നതിനാൽ നിലവിൽ പ്രതിസന്ധി ഉണ്ടാകില്ലെന്നാണ് അധികൃതരുടെ വിലയിരുത്തൽ. കഴിഞ്ഞ വർഷം ടൊറൻ്റോയിൽ ഫുഡ് ബാങ്കിനെ ആശ്രയിക്കുന്നവരുടെ എണ്ണത്തിൽ വൻ വർധനവ് രേഖപ്പെടുത്തിയിരുന്നു. യുഎസ് സൈന്യത്തിൻ്റെ അന്വേഷണം ഉൾപ്പെടെയുള്ള നടപടികൾക്ക് ശേഷം അടുത്ത ആഴ്ചയോടെ മാത്രമേ ചരക്കിൻ്റെ സുരക്ഷയെക്കുറിച്ച് വ്യക്തമായ വിവരം ലഭിക്കുകയുള്ളൂ. വിതരണ ശൃംഖലയിലെ ഇത്തരം വെല്ലുവിളികൾക്കിടയിലും തങ്ങളുടെ സേവനം മുടക്കമില്ലാതെ തുടരുമെന്ന് നീൽ ഹെതറിംഗ്ടൺ കൂട്ടിച്ചേർത്തു.