കാൽഗറിയിൽ എഐ സെൻ്റർ സ്ഥാപിച്ച് എച്ച്സിഎൽ ടെക്നോളജീസ്; കാനഡ-ഇന്ത്യ വാണിജ്യ ബന്ധത്തിൽ നിർണ്ണായക ചുവടുവെപ്പ്

കാനഡയിലെ കാൽഗറിയിൽ ആർട്ടിഫിഷ്യൽ ഇൻ്റിലിജൻസ് കൊളാബൊറേഷൻ സെൻ്റർ ആരംഭിക്കാൻ പ്രമുഖ ഇന്ത്യൻ ഐടി ഭീമനായ എച്ച്‌സിഎൽ ടെക്നോളജീസ്  ഒരുങ്ങുന്നു. ഇന്ത്യയും കാനഡയും തമ്മിലുള്ള പുതിയ വാണിജ്യ കരാറുകളുടെ പശ്ചാത്തലത്തിലാണ് ഈ നീക്കം. ഊർജ്ജം, ഖനനം, ഗതാഗതം, ഹോസ്പിറ്റാലിറ്റി തുടങ്ങിയ മേഖലകളിൽ എഐ അധിഷ്ഠിത പരിഹാരങ്ങൾ കണ്ടെത്താനാണ് ഈ കേന്ദ്രം പ്രധാനമായും ലക്ഷ്യമിടുന്നത്.

ആൽബർട്ട ഇൻസ്റ്റിറ്റ്യൂട്ട് ഓഫ് മെഷീൻ ലേണിംഗ്, യൂണിവേഴ്സിറ്റി ഓഫ് കാൽഗറി എന്നിവയുമായി സഹകരിച്ച് പ്രവർത്തിക്കുന്ന ഈ സ്ഥാപനം ജൂൺ മാസത്തോടെ പൂർണ്ണതോതിൽ പ്രവർത്തനസജ്ജമാകുമെന്ന് എച്ച്‌സിഎൽ കാനഡ മേധാവി ഡേവ് ചോപ്ര അറിയിച്ചു. ഇരു രാജ്യങ്ങളും തമ്മിലുള്ള സാമ്പത്തിക ബന്ധം മെച്ചപ്പെടുത്തുന്നതിനുള്ള കാനഡ സർക്കാരിന്റെ പുതിയ നയങ്ങൾ ബിസിനസ് മേഖലയ്ക്ക് വലിയ ആത്മവിശ്വാസം നൽകുന്നതാണെന്ന് അദ്ദേഹം വ്യക്തമാക്കി. കാൽഗറിയിലെ ഡൗൺടൗൺ ഓഫീസിൽ ഏകദേശം 30 എഐ വിദഗ്ധരെ കേന്ദ്രീകരിച്ച് പ്രവർത്തിക്കുന്ന ഈ സെന്റർ, പ്രാദേശിക സ്റ്റാർട്ടപ്പുകൾക്കും മറ്റ് ചെറുകിട ബിസിനസ്സുകൾക്കും അത്യാധുനിക സാങ്കേതികവിദ്യയിൽ പരിശീലനവും സഹായവും നൽകും.