കാനഡയിൽ ആശുപത്രികളിലെ എമർജൻസി വിഭാഗങ്ങൾ സ്തംഭിക്കുന്നു; ഓരോ വർഷവും ആയിരക്കണക്കിന് മരണങ്ങൾ സംഭവിക്കുന്നതായി റിപ്പോർട്ട്

കാനഡയിലെ ആശുപത്രികളിലെ എമർജൻസി വിഭാഗങ്ങൾ അപകടകരമാംവിധം നിറഞ്ഞുകവിയുകയാണെന്ന് ഡോക്ടർമാർ മുന്നറിയിപ്പ് നൽകുന്നു. പല എമർജൻസി റൂമുകളും അവയുടെ യഥാർത്ഥ ശേഷിയേക്കാൾ വളരെയധികം രോഗികളെയാണ് ഇപ്പോൾ കൈകാര്യം ചെയ്യുന്നത്. ചികിത്സയ്ക്കായി രോഗികൾ മണിക്കൂറുകളോളം, ചിലപ്പോൾ ദിവസങ്ങളോളം കാത്തിരിക്കേണ്ടി വരുന്ന അവസ്ഥയാണുള്ളത്.

ചികിത്സ ലഭിക്കാനുള്ള ഈ കാലതാമസം ഒഴിവാക്കാമായിരുന്ന മരണങ്ങളിലേക്ക് നയിക്കുന്നുവെന്ന് ഡോക്ടർമാർ ചൂണ്ടിക്കാട്ടുന്നു. എമർജൻസി വിഭാഗങ്ങളിലെ തിരക്ക് കാരണം കാനഡയിൽ ഓരോ വർഷവും 8,000 മുതൽ 15,000 വരെ ആളുകൾ  മരണപ്പെടുന്നുണ്ടെന്നാണ് കണക്കുകൾ സൂചിപ്പിക്കുന്നത്. ആരോഗ്യപ്രവർത്തകരുടെ കുറവും അമിതമായ ജോലിഭാരവുമാണ് ഈ പ്രശ്നത്തിന് പ്രധാന കാരണം. നഴ്സുമാരും ഡോക്ടർമാരും കടുത്തസമ്മർദ്ദത്തിലൂടെയാണ് കടന്നു പോകുന്നത്. നിലവിലെ സാഹചര്യത്തിൽ പല ഡോക്ടർമാരും നിസ്സഹായാവസ്ഥ പ്രകടിപ്പിക്കുന്നുണ്ട്.

ഗുരുതരാവസ്ഥയിലുള്ള രോഗികൾക്ക് പോലും ആശുപത്രികളിൽ ബെഡ് ലഭിക്കാൻ വലിയ താമസമാണ് നേരിടുന്നത്. ഇത് അടിയന്തര ചികിത്സാ സംവിധാനത്തെയാകെ തകരാറിലാക്കിയിരിക്കുകയാണ്. വേഗത്തിലുള്ള ചികിത്സ ലഭ്യമായിരുന്നെങ്കിൽ രക്ഷിക്കാമായിരുന്ന ജീവനുകളാണ് വെറും കാത്തിരിപ്പ് മൂലം നഷ്ടമാകുന്നത്. ഈ സാഹചര്യത്തിൽ അടിയന്തരമായ ഇടപെടൽ വേണമെന്നാണ് ആരോഗ്യവിദഗ്ധരുടെ ആവശ്യം.