ബ്രിട്ടീഷ് കൊളംബിയയിൽ ഡ്രൈവർമാർക്കായി 'MyICBC' പോർട്ടൽ; ഇൻഷുറൻസ് പുതുക്കാനും ലൈസൻസ് സേവനങ്ങൾക്കും ഇനി വിരൽത്തുമ്പിൽ പരിഹാരം

 

ബ്രിട്ടീഷ് കൊളംബിയയിലെ ഡ്രൈവർമാർക്ക് ആശ്വാസമായി ഐ.സി.ബി.സി  പുതിയ ഓൺലൈൻ പോർട്ടൽ പുറത്തിറക്കി. 'MyICBC' എന്ന് പേരിട്ടിരിക്കുന്ന ഈ സംവിധാനം വഴി ഇൻഷുറൻസ് പുതുക്കൽ, ലൈസൻസ് മാനേജ്‌മെന്റ്, ക്ലെയിം റിപ്പോർട്ടിംഗ് തുടങ്ങിയ സേവനങ്ങൾ ഇനി ഓഫീസുകളിൽ നേരിട്ട് പോകാതെ തന്നെ പൂർത്തിയാക്കാം. പ്രവിശ്യയിലെ സേവനങ്ങൾ ആധുനികവൽക്കരിക്കുന്നതിന്റെ ഭാഗമായാണ് ഈ നടപടിയെന്ന് സർക്കാർ അറിയിച്ചു. 

 ഉപഭോക്താക്കൾക്ക് അവരുടെ ഇൻഷുറൻസ് പോളിസികൾ ഓൺലൈനായി പുതുക്കാനും തുക മുൻകൂട്ടി അറിയാനും ഈ പോർട്ടലിലൂടെ സാധിക്കും. പോളിസി രേഖകൾ വീട്ടിലിരുന്ന് തന്നെ പ്രിന്റ് എടുക്കാനും ഇതിലൂടെ സൗകര്യമുണ്ട്.
ഡ്രൈവിംഗ് ലൈസൻസിന്റെയോ ബി.സി.ഐ.ഡി (BCID) കാർഡിന്റെയോ നിലവിലെ അവസ്ഥ പരിശോധിക്കാനും, തപാലിൽ വരുന്ന ലൈസൻസ് എവിടെ എത്തിയെന്ന് ട്രാക്ക് ചെയ്യാനും സാധിക്കും. ലൈസൻസ് സംബന്ധമായ അപ്പോയിന്റ്‌മെന്റുകൾ ബുക്ക് ചെയ്യാനും പുതിയ ഡ്രൈവർമാർക്ക് പരിശീലന പരീക്ഷകൾ എഴുതാനും ഇതിൽ സംവിധാനമുണ്ട്.

ട്രാഫിക് ടിക്കറ്റുകൾ അടയ്ക്കാനും ഐ.സി.ബി.സിക്ക് നൽകാനുള്ള കുടിശ്ശികകൾ തീർക്കാനും പോർട്ടൽ സഹായിക്കും. ബാങ്ക് അക്കൗണ്ടിലേക്ക് നേരിട്ട് പണം ലഭിക്കുന്നതിനുള്ള 'ഡയറക്ട് ഡെപ്പോസിറ്റ്' സൗകര്യവും ഇതിൽ ഉൾപ്പെടുത്തിയിട്ടുണ്ട്. അപകടങ്ങൾ ഉണ്ടായാൽ പോർട്ടൽ വഴി നേരിട്ട് റിപ്പോർട്ട് ചെയ്യാം. വാഹനങ്ങൾ നന്നാക്കാനുള്ള വർക്ക് ഷോപ്പുകളെക്കുറിച്ചും ചികിത്സാ സൗകര്യങ്ങളെക്കുറിച്ചുമുള്ള വിവരങ്ങളും ഇതിൽ ലഭ്യമാണ്.  ICBC website എന്ന ലിങ്കിലൂടെ വെബ് സൈറ്റിൽ പ്രവേശിക്കാവുന്നതാണ്.