ഇറാൻ യുദ്ധം: സൈനിക നടപടികളിൽ പങ്കുചേരില്ലെന്ന് കാനഡ

 

ഇറാനിലെ സൈനിക നടപടിയിൽ കാനഡ പങ്കുചേരില്ലെന്ന് പ്രതിരോധ മന്ത്രി ഡേവിഡ് മക്ജിന്റി വ്യക്തമാക്കി. ഓട്ടവയിൽ നടന്ന വാർത്താസമ്മേളനത്തിലാണ് അദ്ദേഹം ഇക്കാര്യം ഔദ്യോഗികമായി അറിയിച്ചത്. യുഎസും ഇസ്രായേലും നടത്തിയ ആക്രമണങ്ങൾക്ക് മുൻപ് കാനഡയുമായി ഒരുതരത്തിലുള്ള കൂടിയാലോചനകളും നടത്തിയിട്ടില്ലെന്നും, ആ ആക്രമണങ്ങളിൽ കാനഡ പങ്കാളിയല്ലെന്നും മക്ജിന്റി വിശദീകരിച്ചു. ഇനി അത്തരം നടപടികളിൽ കാനഡ പങ്കുചേരുകയുമില്ല.

നേരത്തെ സൈനിക ഇടപെടലുകൾക്കുള്ള സാധ്യത പ്രധാനമന്ത്രി മാർക്ക് കാർണി തള്ളിക്കളഞ്ഞിരുന്നില്ല. സഖ്യകക്ഷികൾക്ക് സഹായം ആവശ്യമായി വന്നാൽ ഇടപെടേണ്ടി വരുമെന്ന് അദ്ദേഹം സൂചിപ്പിച്ചിരുന്നു. എന്നാൽ പ്രതിരോധ മന്ത്രിയുടെ ഈ പ്രസ്താവനയോടെ കാനഡയുടെ നിലപാട് ഇപ്പോൾ കൂടുതൽ വ്യക്തമായിരിക്കുകയാണ്. ആക്രമണം നേരിടുന്ന ഗൾഫ് രാജ്യങ്ങൾക്ക് സൈനിക സഹായം നൽകാൻ കാനഡ ഇതുവരെ തീരുമാനിച്ചിട്ടില്ല. ഫ്രാൻസ്, യുകെ തുടങ്ങിയ ചില നാറ്റോ സഖ്യകക്ഷികൾ ഇതിനകം സേനയെ വിന്യസിച്ചിട്ടുണ്ടെങ്കിലും, അത്തരം നീക്കങ്ങളിൽ നിന്ന് വിട്ടുനിൽക്കാനാണ് കാനഡയുടെ തീരുമാനം.

നിലവിൽ മിഡിൽ ഈസ്റ്റിലെ സ്ഥിതിഗതികൾ സർക്കാർ അതീവ ശ്രദ്ധയോടെ നിരീക്ഷിച്ചുവരികയാണെന്ന് മക്ജിന്റി അറിയിച്ചു. അവിടെയുള്ള കാനഡക്കാരുടെ സുരക്ഷയ്ക്കാണ് സർക്കാർ പ്രഥമ പരിഗണന നൽകുന്നത്. മേഖല വിട്ടുപോകാൻ ആഗ്രഹിക്കുന്ന കാനഡക്കാരെ സഹായിക്കുന്നതിനായി സർക്കാർ വിപുലമായ സംവിധാനങ്ങൾ ഒരുക്കിയിട്ടുണ്ട്. ഇതിനോടകം 9,000-ത്തിലധികം കാനഡക്കാർ സഹായം തേടി ബന്ധപ്പെട്ടിട്ടുണ്ട്.  ഇവർക്കായി പ്രത്യേക വിമാനങ്ങളും റോഡ് മാർഗ്ഗമുള്ള യാത്രാ സൗകര്യങ്ങളും സർക്കാർ ഏർപ്പെടുത്തിയിട്ടുണ്ട്. ഇറാനിലുള്ളവർ കോൺസുലർ സഹായങ്ങൾക്കായി അയൽരാജ്യങ്ങളെ ആശ്രയിക്കണമെന്ന് അധികൃതർ നിർദ്ദേശിച്ചു.