വീടുകളുടെ വാതിലുകളിൽ ദുരൂഹമായ പശ അടയാളങ്ങൾ: ജാഗ്രതാ നിർദ്ദേശവുമായി ന്യൂ വെസ്റ്റ്മിൻസ്റ്റർ പോലീസ്

അപ്പാർട്ട്മെൻ്റുകളുടെ വാതിലുകളിൽ ദുരൂഹമായ രീതിയിൽ പശ കൊണ്ടുള്ള അടയാളങ്ങൾ കണ്ടെത്തിയതിനെത്തുടർന്ന് ന്യൂ വെസ്റ്റ്മിൻസ്റ്റർ പോലീസ് ഡിപ്പാർട്ട്മെൻ്റ്  താമസക്കാർക്ക് ജാഗ്രതാ നിർദ്ദേശം നൽകി. ക്വീൻസ് അവന്യൂവിന് സമീപമുള്ള ഒരു മൾട്ടി-ഫാമിലി കെട്ടിടത്തിലെ പത്തോളം നിലകളിലായി നിരവധി വീടുകളുടെ വാതിലുകൾക്കും ഫ്രെയിമുകൾക്കും ഇടയിലാണ് ഇത്തരം ചെറിയ പശ നാരുകൾ കണ്ടെത്തിയത്. വീടുകളിൽ ആളുണ്ടോ എന്ന് തിരിച്ചറിയാൻ മോഷ്‌ടാക്കൾ ഉപയോഗിക്കുന്ന പുതിയ തന്ത്രമാണിതെന്ന് പോലീസ് സംശയിക്കുന്നു. വാതിൽ തുറക്കുമ്പോൾ ഈ പശ നാരുകൾ പൊട്ടിപ്പോകുമെന്നും, എന്നാൽ അവ പൊട്ടാതെ ഇരിക്കുന്നത് ആ വീട്ടിൽ ആളില്ലെന്നതിൻ്റെ സൂചനയായി മോഷ്‌ടാക്കൾ കണക്കാക്കുന്നുവെന്നും അധികൃതർ വ്യക്തമാക്കി.

വാൻകൂവർ പോലീസ് ഡിപ്പാർട്ട്മെൻ്റ് നേരത്തെ നൽകിയ മുന്നറിയിപ്പിനെത്തുടർന്ന് താമസക്കാർ നടത്തിയ പരിശോധനയിലാണ് ഇത്  ശ്രദ്ധയിൽപ്പെട്ടത്. വാതിലുകൾക്ക് സമീപം പശയോ ടേപ്പോ അല്ലെങ്കിൽ അസ്വാഭാവികമായ മറ്റെന്തെങ്കിലും അടയാളങ്ങളോ കണ്ടാൽ ഉടൻ ശ്രദ്ധിക്കണമെന്ന് പോലീസ് അറിയിച്ചു. സ്വന്തം വീടുകൾ ഇത്തരത്തിൽ ലക്ഷ്യം വയ്ക്കപ്പെടുന്നുണ്ടെന്ന് സംശയം തോന്നുന്നവർ ഉടൻ തന്നെ 604-525-5411 എന്ന നമ്പറിൽ പോലീസിനെ വിവരമറിയിക്കാൻ നിർദ്ദേശമുണ്ട്. അയൽവാസികളുമായി ആശയവിനിമയം നടത്താനും കെട്ടിടത്തിൻ്റെ സുരക്ഷ ഉറപ്പാക്കാനും താമസക്കാർ കൂടുതൽ ശ്രദ്ധ പുലർത്തണമെന്നും പോലീസ് ഓർമ്മിപ്പിച്ചു