കാനഡയിൽ നിന്ന് വേർപിരിയണമെന്ന വാദത്തിന് ആൽബർട്ടയിൽ ജനപിന്തുണ കുറയുന്നതായി റിപ്പോർട്ട്

കാനഡയിൽ നിന്ന് വേർപിരിഞ്ഞ് സ്വതന്ത്രമാകണമെന്ന വാദത്തിന് ആൽബർട്ടയിൽ ജനപിന്തുണ കുറയുന്നതായി റിപ്പോർട്ട്. പ്രമുഖ സർവ്വേ ഏജൻസിയായ 'അബാക്കസ് ഡാറ്റ' 2026 ഫെബ്രുവരി അവസാന വാരം നടത്തിയ സർവ്വേയിലാണ് ആൽബർട്ടയിലെ ഭൂരിഭാഗം ജനങ്ങളും വേർപിരിയൽ നീക്കത്തിന് എതിരാണെന്ന കണ്ടെത്തലുള്ളത്.

ആൽബർട്ടയിലെ ഏകദേശം 1,000 മുതിർന്ന പൗരന്മാരിൽ നിന്ന് വിവരങ്ങൾ ശേഖരിച്ച് നടത്തിയ സർവ്വേയിൽ, വെറും 26 ശതമാനം പേർ മാത്രമാണ് സ്വാതന്ത്ര്യത്തെ അനുകൂലിച്ചത്. എന്നാൽ 64 ശതമാനം പേരും കാനഡയിൽ നിന്ന് വേർപിരിയുന്നതിനെ ശക്തമായി എതിർക്കുന്നു. ഒൻപത് ശതമാനം പേർക്ക് വിഷയത്തിൽ വ്യക്തമായ നിലപാടില്ല. വേർപിരിയലിനെ എതിർത്തവരിൽ പകുതിയിലധികം പേരും തങ്ങളുടെ നിലപാട് വളരെ കർക്കശമാണെന്നും വ്യക്തമാക്കിയിട്ടുണ്ട്.

ഗ്രാമീണ മേഖലകളിലാണ് വേർപിരിയൽ വാദത്തിന് നേരിയ പിന്തുണയെങ്കിലും ഉള്ളത് (35%). എന്നാൽ നഗരപ്രദേശങ്ങളിലും, പ്രത്യേകിച്ച് സ്ത്രീകൾക്കിടയിലും പ്രായമായവർക്കിടയിലും വേർപിരിയലിനെതിരെയുള്ള വികാരം അതിശക്തമാണ്. എൻഡിപി വോട്ടർമാരിൽ 82 ശതമാനവും വേർപിരിയലിനെ തള്ളിക്കളയുമ്പോൾ, ഭരണകക്ഷിയായ യുസിപി  വോട്ടർമാർക്കിടയിൽ  ഭിന്നാഭിപ്രായമാണുള്ളത്. യുസിപി അനുകൂലികളിൽ 42 ശതമാനം പേർ സ്വാതന്ത്ര്യത്തെ പിന്തുണയ്ക്കുമ്പോൾ 48 ശതമാനം പേർ എതിർക്കുന്നു.

പ്രീമിയർ ഡാനിയൽ സ്മിത്ത് വേർപിരിയലിന് അനുകൂലമായി വോട്ട് ചെയ്തേക്കാം എന്ന് സർവ്വേയിൽ പങ്കെടുത്ത പകുതിയിലധികം പേരും വിശ്വസിക്കുന്നു. എന്നാൽ കാനഡയ്ക്കുള്ളിൽ നിന്നുകൊണ്ട് തന്നെയുള്ള ശക്തമായ ആൽബർട്ടയെയാണ് താൻ ആഗ്രഹിക്കുന്നതെന്ന് സ്മിത്ത് ആവർത്തിച്ച് വ്യക്തമാക്കിയിട്ടുണ്ട്.