ആരോഗ്യമേഖലയ്ക്ക് കോടികൾ അനുവദിച്ച് ആൽബർട്ട; ആശുപത്രി നവീകരണം വൈകുമെന്ന് സൂചന

 

 

ആശുപത്രികളിലെ തിരക്ക് കുറയ്ക്കുന്നതിനും ശസ്ത്രക്രിയകൾക്കായുള്ള കാത്തിരിപ്പ് സമയം ലഘൂകരിക്കുന്നതിനുമായി ആൽബർട്ട സർക്കാർ 34.4 ബില്യൺ ഡോളറിൻ്റെ വിപുലമായ ആരോഗ്യ പദ്ധതി പ്രഖ്യാപിച്ചു. ജനസംഖ്യാ വർധനവും പ്രായമായവരുടെ എണ്ണത്തിലുണ്ടാകുന്ന വർധനവും കണക്കിലെടുത്താണ് ഈ നീക്കമെന്ന് ഹോസ്പിറ്റൽ ആൻഡ് സർജിക്കൽ ഹെൽത്ത് സർവീസസ് മന്ത്രി മാറ്റ് ജോൺസ് വ്യക്തമാക്കി.

പുതിയ ബജറ്റ് പ്രകാരം ആശുപത്രികളുടെ പ്രവർത്തനത്തിനും വിപുലീകരണത്തിനുമായി 13.8 ബില്യൺ ഡോളർ നീക്കിവെച്ചിട്ടുണ്ട്. ഇത് കഴിഞ്ഞ വർഷത്തെ അപേക്ഷിച്ച് 1.7 ബില്യൺ ഡോളറിൻ്റെ വർധനവാണ് രേഖപ്പെടുത്തുന്നത്. ആരോഗ്യമേഖലയിലെ അടിസ്ഥാന സൗകര്യ വികസനത്തിനായി മാത്രം 4.9 ബില്യൺ ഡോളറാണ് ഇത്തവണ അനുവദിച്ചിരിക്കുന്നത്.  

ആരോഗ്യരംഗത്ത് വൻതോതിലുള്ള നിക്ഷേപം സർക്കാർ വാഗ്ദാനം ചെയ്യുന്നുണ്ടെങ്കിലും പുതിയ ആശുപത്രി ടവറുകളുടെ നിർമ്മാണം പൂർത്തിയാകാൻ ഇനിയും വർഷങ്ങൾ കാത്തിരിക്കേണ്ടി വരുമെന്നാണ് റിപ്പോർട്ടുകൾ സൂചിപ്പിക്കുന്നത്. നിലവിൽ ഗ്രാമീണ മേഖലയിലെ ആശുപത്രികളുടെ നവീകരണത്തിനായി 315 മില്യൺ ഡോളറും, ആശുപത്രികളിലെ ഒഴിഞ്ഞുകിടക്കുന്ന സ്ഥലങ്ങൾ പ്രയോജനപ്പെടുത്തുന്നതിനായി 63 മില്യൺ ഡോളറും നീക്കിവെച്ചിട്ടുണ്ട്. ഇതിനുപുറമെ ഡയഗ്നോസ്റ്റിക് ഇമേജിംഗ് സംവിധാനങ്ങൾ മെച്ചപ്പെടുത്തുന്നതിനും എമർജൻസി ഹെൽത്ത് സർവീസസ് (EHS) വാഹനങ്ങൾ നവീകരിക്കുന്നതിനും സർക്കാർ മുൻഗണന നൽകുന്നുണ്ട്