കനേഡിയൻ പൗരത്വ നിയമത്തിൽ വൻ ഇളവ്: ദശലക്ഷക്കണക്കിന് അമേരിക്കക്കാർക്ക് ഇരട്ട പൗരത്വത്തിന് വഴിതെളിയുന്നു

കാനഡയുടെ പുതിയ പൗരത്വ നിയമഭേദഗതി (Bill C-3) പ്രാബല്യത്തിൽ വന്നതോടെ, പാരമ്പര്യമായി കനേഡിയൻ ബന്ധമുള്ള ദശലക്ഷക്കണക്കിന് അമേരിക്കൻ പൗരന്മാർക്ക് ഇനി കനേഡിയൻ പാസ്‌പോർട്ടിന് അർഹതയുണ്ടാകും. 2025 ഡിസംബർ 15-ന് മുൻപ് ജനിച്ചവർക്കും തങ്ങളുടെ മുൻഗാമികൾ കാനഡക്കാരാണെന്ന് തെളിയിക്കാൻ സാധിക്കുന്നവർക്കും ഈ ആനുകൂല്യം ലഭിക്കും.

മുൻപുണ്ടായിരുന്ന First-Generation Limit കോടതി ഭരണഘടനാ വിരുദ്ധമായി പ്രഖ്യാപിച്ചതിനെത്തുടർന്നാണ് പുതിയ നിയമം നടപ്പിലാക്കിയത്. ഇതനുസരിച്ച്, അപേക്ഷകൻ്റെ മാതാപിതാക്കളോ മുത്തശ്ശിമാരോ കാനഡയിൽ ജീവിച്ചവരോ പാസ്‌പോർട്ട് കൈവശം വെച്ചിട്ടുള്ളവരോ ആകണമെന്ന നിർബന്ധമില്ല; രേഖാമൂലം വംശപരമ്പര തെളിയിച്ചാൽ മാത്രം മതിയാകും.
ഇരട്ട പൗരത്വം ലഭിക്കുന്നതിലൂടെ നികുതി ബാധ്യതകൾ ഉണ്ടാകില്ലെന്നത് ഈ നിയമത്തിൻ്റെ പ്രധാന ആകർഷണമാണ്. അമേരിക്കൻ നിയമങ്ങളിൽ നിന്ന് വ്യത്യസ്തമായി, കാനഡയിൽ താമസിക്കുന്നവർക്ക് മാത്രമേ അവിടെ ആദായനികുതി ബാധ്യതയുള്ളൂ. അതിനാൽ കാനഡയിലേക്ക് താമസം മാറാത്തവർക്ക് പുതിയ പൗരത്വം അധിക സാമ്പത്തിക ബാധ്യതകൾ വരുത്തിവെക്കില്ല.

നിലവിൽ 11 മാസമാണ് പൗരത്വ രേഖകൾ ലഭിക്കാനുള്ള ഏകദേശ സമയപരിധി. ഈ മാറ്റം പ്രത്യേകിച്ച് ന്യൂ ഇംഗ്ലണ്ട് മേഖലയിലുള്ള ഏകദേശം മുപ്പത് ലക്ഷത്തോളം അമേരിക്കക്കാർക്ക് ഗുണകരമാകുമെന്നാണ് കണക്കാക്കപ്പെടുന്നത്. കനേഡിയൻ പാസ്‌പോർട്ട് വഴി ലഭിക്കുന്ന അധിക യാത്രാ സ്വാതന്ത്ര്യവും കാനഡയിൽ സ്ഥിരതാമസമാക്കാനുള്ള അവകാശവും ഇതോടെ ഇവർക്ക് സ്വന്തമാകും