ആൽബർട്ടയിലെ കോണ്ടോമിനിയം ഉടമകൾക്കായി പുതിയ നിയമങ്ങൾ പ്രഖ്യാപിച്ചു

ആൽബർട്ടയിലെ കോണ്ടോമിനിയം ഉടമകൾക്കായി പുതിയ നിയമങ്ങൾ പ്രഖ്യാപിച്ചു. പെട്ടെന്നുണ്ടാകുന്ന ഭാവിയിലെ വലിയ അറ്റകുറ്റപ്പണി ചെലവുകളിൽ നിന്ന് ഉടമകളെ സംരക്ഷിക്കുക എന്നതാണ് ഈ തീരുമാനത്തിന്റെ പ്രധാന ലക്ഷ്യം.

പുതിയ നിയമപ്രകാരം, എല്ലാ പുതിയ കോണ്ടോമിനിയങ്ങളും താമസമുറപ്പിച്ച് നാല് വർഷത്തിനുള്ളിൽ നിർബന്ധമായും ഒരു 'ടെക്നിക്കൽ റിവ്യൂവിന്'   വിധേയമാകണം. കെട്ടിടത്തിന്റെ ഗുണനിലവാരം പരിശോധിക്കാൻ ഒരു സ്വതന്ത്ര എഞ്ചിനീയറെയോ ആർക്കിടെക്റ്റിനെയോ നിയമിക്കും. ഇതിനായുള്ള ചെലവ് ഉടമകളല്ല, മറിച്ച് കെട്ടിടം നിർമ്മിച്ച ഡെവലപ്പർമാരാണ് വഹിക്കേണ്ടത്. കെട്ടിടത്തിന്റെ അവസ്ഥയെക്കുറിച്ചും ഭാവിയിൽ വരാനിടയുള്ള അറ്റകുറ്റപ്പണി ചെലവുകളെക്കുറിച്ചും വ്യക്തമായ റിപ്പോർട്ട് ഇതിലൂടെ ഉടമകൾക്ക് ലഭിക്കും.

സർവീസ് ആൽബർട്ട മന്ത്രി ഡെയ്‌ൽ നല്ലി  ആണ് ഈ മാറ്റങ്ങൾ പ്രഖ്യാപിച്ചത്. സുതാര്യതയും നീതിയും ഉറപ്പാക്കാനാണ് സർക്കാർ ശ്രമിക്കുന്നതെന്ന് അദ്ദേഹം പറഞ്ഞു. കൂടാതെ കോണ്ടോ ബോർഡുകൾക്ക് കർശനമായ പെരുമാറ്റച്ചട്ടങ്ങൾ ഏർപ്പെടുത്തുകയും ഉടമകൾക്ക് കൂടുതൽ പ്രാധാന്യം നൽകുകയും ചെയ്യും.

കോണ്ടോ സംബന്ധമായ തർക്കങ്ങൾ പരിഹരിക്കാൻ ഒരു പ്രത്യേക ട്രിബ്യൂണലും ഉടൻ നിലവിൽ വരും. അടുത്ത വർഷം പകുതിയോടെ ഇത് നിലവിൽ വരുമെന്നാണ് പ്രതീക്ഷിക്കുന്നത്. കോടതികളെ അപേക്ഷിച്ച് കുറഞ്ഞ ചെലവിലും വേഗത്തിലും പരാതികൾ തീർപ്പാക്കാൻ ഇതിലൂടെ സാധിക്കും. കനേഡിയൻ കോണ്ടോ ഇൻസ്റ്റിറ്റ്യൂട്ട് ഈ മാറ്റങ്ങളെ സ്വാഗതം ചെയ്തു.