സമയമാറ്റം തുടരാൻ ഒൻ്റാരിയോ; ബ്രിട്ടീഷ് കൊളംബിയയുടെ മാതൃക പിന്തുടരില്ല

 ബ്രിട്ടീഷ് കൊളംബിയയിൽ രണ്ടുതവണയുള്ള സമയമാറ്റം (Time Change) ഔദ്യോഗികമായി അവസാനിപ്പിച്ചെങ്കിലും ഒൻ്റാരിയോയിൽ നിലവിലെ രീതി തുടരും. പകൽ വെളിച്ചം കൂടുതൽ പ്രയോജനപ്പെടുത്തുന്നതിനായി 'ഡേലൈറ്റ് സേവിംഗ് ടൈം' സ്ഥിരപ്പെടുത്താനാണ് ബ്രിട്ടീഷ് കൊളംബിയ തീരുമാനിച്ചത്. എന്നാൽ,  ക്യൂബെക്കും ന്യൂയോർക്കും സമാനമായ തീരുമാനം എടുക്കാതെ ഒൻ്റാരിയോയിൽ മാറ്റം കൊണ്ടുവരില്ലെന്ന് പ്രീമിയർ ഡഗ് ഫോർഡ് വ്യക്തമാക്കി.

2020-ൽ ഇതുസംബന്ധിച്ച നിയമം ഒൻ്റാരിയോ പാസാക്കിയിട്ടുണ്ടെങ്കിലും ഈ നിബന്ധന നിലനിൽക്കുന്നതിനാൽ സമയമാറ്റം തുടരേണ്ടി വരും. വർഷത്തിൽ രണ്ടുതവണ ക്ലോക്കിലെ സമയം മാറ്റുന്നത് ജനജീവിതത്തിൽ വലിയ ആശയക്കുഴപ്പമുണ്ടാക്കുന്നുവെന്ന് ബിസി പ്രീമിയർ ഡേവിഡ് ഇബി പറഞ്ഞു. ഈ മാറ്റം ബിസിനസ് മേഖലയ്ക്കും കുടുംബങ്ങൾക്കും ഗുണകരമാകുമെന്നാണ് വിലയിരുത്തൽ.

ഒൻ്റാരിയോ ഈ പരിഷ്കാരത്തിന് തയ്യാറാണെങ്കിലും സാമ്പത്തിക-യാത്രാ മേഖലകളിലെ സങ്കീർണ്ണതകൾ ഒഴിവാക്കാനാണ് ക്യൂബെക്കിൻ്റെയും ന്യൂയോർക്കിൻ്റെയും സഹകരണം പ്രതീക്ഷിക്കുന്നത്. നിലവിൽ സസ്കാച്ചുവൻ, യുകോൺ തുടങ്ങിയ പ്രവിശ്യകളിൽ സമയമാറ്റം നടപ്പിലാക്കുന്നില്ല. ഈ ഞായറാഴ്ച പുലർച്ചെ രണ്ട് മണിക്ക് ക്ലോക്കുകൾ ഒരു മണിക്കൂർ മുന്നോട്ട് നീക്കുന്നതോടെ ഒൻ്റാരിയോയിൽ പുതിയ സമയക്രമം നിലവിൽ വരും.