കാനഡയിൽ തീവ്രവാദ ഭീഷണി ഉയർത്തി 'വൈറ്റ് നാഷണലിസ്റ്റ്' ഫൈറ്റ് ക്ലബ്ബുകൾ; ജാഗ്രതാ നിർദ്ദേശവുമായി പബ്ലിക് സേഫ്റ്റി റിപ്പോർട്ട്

കാനഡയിൽ 'ആക്റ്റീവ് ക്ലബ്ബ്' എന്ന പേരിൽ അറിയപ്പെടുന്ന തീവ്ര വലതുപക്ഷ ഗ്രൂപ്പുകൾ രാജ്യസുരക്ഷയ്ക്ക് വലിയ ഭീഷണിയാകുന്നതായി പബ്ലിക് സേഫ്റ്റി കാനഡയുടെ ആഭ്യന്തര റിപ്പോർട്ട്. കായിക പരിശീലനത്തിന്റെയും ബോക്സിംഗ് പോലുള്ള കായിക വിനോദങ്ങളുടെയും മറവിൽ പ്രവർത്തിക്കുന്ന ഈ സംഘടനകൾ വംശീയമായ അക്രമങ്ങൾക്കും  ആഭ്യന്തര കലാപങ്ങൾക്കും കോപ്പുകൂട്ടുന്നതായാണ് സിബിസി ന്യൂസ് പുറത്തുവിട്ട റിപ്പോർട്ട് വ്യക്തമാക്കുന്നത്.

ആഗോളതലത്തിൽ പ്രവർത്തിക്കുന്ന ഇരുന്നൂറോളം ആക്റ്റീവ് ക്ലബ്ബ് ചാപ്റ്ററുകളിൽ മുപ്പതിലധികം എണ്ണം കാനഡയിലാണ് കേന്ദ്രീകരിച്ചിരിക്കുന്നത് എന്നത് ഭീഷണിയുടെ ആഴം വർദ്ധിപ്പിക്കുന്നു. മുൻപ് വെറും ഓൺലൈൻ ചർച്ചകളിൽ മാത്രം ഒതുങ്ങിയിരുന്ന ഇത്തരം ഫാസിസ്റ്റ് ഗ്രൂപ്പുകൾ, ഇപ്പോൾ പൊതുസ്ഥലങ്ങളിൽ കായിക പരിശീലനം നടത്താനും പരസ്യമായി പ്രതിഷേധ പ്രകടനങ്ങളിൽ ഏർപ്പെടാനും തുടങ്ങിയിട്ടുണ്ട്.

'ആറ്റംവാഫെൻ ഡിവിഷൻ'  പോലുള്ള നിരോധിത തീവ്രവാദ സംഘടനകളുമായി ബന്ധമുള്ള വ്യക്തികളാണ് പലപ്പോഴും ഇത്തരം ക്ലബ്ബുകൾക്ക് നേതൃത്വം നൽകുന്നത്. വംശീയ വിദ്വേഷം പ്രചരിപ്പിക്കുന്നതിലൂടെ രാജ്യത്തിൻ്റെ സമാധാനാന്തരീക്ഷം തകർക്കാൻ ഇവർ ശ്രമിക്കുന്നുണ്ടെന്നും, ഇത്തരം 'ഐഡിയോളജിക്കൽ എക്സ്ട്രീമിസം' തടയാൻ സർക്കാർ അടിയന്തരമായി ഇടപെടണമെന്നും കനേഡിയൻ ആന്റി-ഹേറ്റ് നെറ്റ്‌വർക്ക് ഉൾപ്പെടെയുള്ള മനുഷ്യാവകാശ സംഘടനകൾ ആവശ്യപ്പെട്ടു.