കനേഡിയൻ പ്രധാനമന്ത്രിക്കെതിരെ ഭീഷണി: വിന്നിപെഗ് സ്വദേശി പിടിയിൽ

കനേഡിയൻ പ്രധാനമന്ത്രി മാർക്ക് കാർണിക്കെതിരെ സോഷ്യൽ മീഡിയയിലൂടെ വധഭീഷണി മുഴക്കുകയും വിദ്വേഷ സന്ദേശങ്ങൾ പ്രചരിപ്പിക്കുകയും ചെയ്ത 55-കാരൻ പിടിയിലായി. വിന്നിപെഗ് സ്വദേശിയായ ജേസൺ പോൾ റിൻഡാലാണ് ഗുരുതരമായ നിയമനടപടികൾ നേരിടുന്നത്.

സോഷ്യൽ മീഡിയ പ്ലാറ്റ്‌ഫോമായ 'X'-ലൂടെയാണ് ഇയാൾ പ്രധാനമന്ത്രിക്കെതിരെ ഭീഷണി സന്ദേശങ്ങൾ പോസ്റ്റ് ചെയ്തത്. ജനുവരി 16-ന് ആരംഭിച്ച അന്വേഷണത്തിനൊടുവിൽ ഫെബ്രുവരി 13-നാണ് കനേഡിയൻ പോലീസ് (RCMP) ഇയാളെ അറസ്റ്റ് ചെയ്തത്.പ്രധാനമന്ത്രിയെ ഭീഷണിപ്പെടുത്തിയതിന് പുറമെ, ജൂത-മുസ്ലിം വിഭാഗങ്ങൾക്കെതിരെ വിദ്വേഷം പടർത്തുന്ന രീതിയിലുള്ള സന്ദേശങ്ങളും ഇയാൾ പങ്കുവെച്ചതായി പോലീസ് കണ്ടെത്തിയിട്ടുണ്ട്.

ആർ.സി.എം.പിയുടെ നാഷണൽ സെക്യൂരിറ്റി എൻഫോഴ്സ്‌മെന്റ് വിഭാഗമാണ് കേസന്വേഷണത്തിന് നേതൃത്വം നൽകിയത്. വധഭീഷണി മുഴക്കിയതിന് മൂന്ന് വ്യത്യസ്ത വകുപ്പുകൾ പ്രകാരമാണ് ഇയാൾക്കെതിരെ കേസെടുത്തിരിക്കുന്നത്.നിലവിൽ പോലീസ് കസ്റ്റഡിയിലുള്ള റിൻഡാലിനെ മാർച്ച് 13-ന് വിന്നിപെഗ് പ്രൊവിൻഷ്യൽ കോടതിയിൽ ഹാജരാക്കും.

പൊതുപ്രവർത്തകരുടെ സുരക്ഷാ സാഹചര്യം മാറിക്കൊണ്ടിരിക്കുകയാണെന്നും ഓൺലൈൻ വഴിയുള്ള ഭീഷണികളെ ഗൗരവത്തോടെയാണ് കാണുന്നതെന്നും പോലീസ് വ്യക്തമാക്കി. ഇത്തരം ദോഷകരമായ പോസ്റ്റുകൾ ശ്രദ്ധയിൽപ്പെട്ടാൽ ഉടൻ അധികൃതരെ അറിയിക്കണമെന്ന് പൊതുജനങ്ങളോട് പോലീസ് നിർദ്ദേശിച്ചു. ദേശീയ സുരക്ഷ സംരക്ഷിക്കുന്നതിൽ വിട്ടുവീഴ്ചയുണ്ടാകില്ലെന്ന് കനേഡിയൻ ഉദ്യോഗസ്ഥരും അറിയിച്ചു.