സമയമാറ്റത്തിന് വിടചൊല്ലി ബ്രിട്ടീഷ് കൊളംബിയ; ഇനി മുതൽ 'പെസഫിക് ടൈം' സ്ഥിരസംവിധാനം

വർഷത്തിൽ രണ്ടുതവണ ക്ലോക്കിലെ സമയം മാറ്റുന്ന രീതി അവസാനിപ്പിക്കാൻ ബ്രിട്ടീഷ് കൊളംബിയ തീരുമാനിച്ചു. ഇനി മുതൽ ബ്രിട്ടീഷ് കൊളംബിയയിൽ 'പെർമനന്റ് ഡേ ലൈറ്റ് ടൈം' ആയിരിക്കും പിന്തുടരുക. പ്രവിശ്യാ പ്രീമിയർ ഡേവിഡ് എബി ആണ് ഇത് സംബന്ധിച്ച നിർണ്ണായക പ്രഖ്യാപനം നടത്തിയത്. 

2026 മാർച്ച് 8-നായിരിക്കും അവസാനമായി ഇവിടുത്തെ താമസക്കാർ ക്ലോക്കിലെ സമയം ഒരു മണിക്കൂർ മുന്നോട്ട് തിരിക്കുക. നവംബർ ഒന്നിന് സാധാരണയായി സമയം പിന്നോട്ട് മാറ്റാറുണ്ടെങ്കിലും, പുതിയ തീരുമാനപ്രകാരം ഇത്തവണ മാറ്റമുണ്ടാകില്ല. ഇതോടെ 'പെസഫിക് ടൈം' എന്നറിയപ്പെടുന്ന സ്ഥിരമായ സമയക്രമത്തിലേക്ക് പ്രവിശ്യ മാറും. സമയമാറ്റം ഒഴിവാക്കുന്നത് ജനങ്ങളുടെ ഉറക്കപ്രശ്നങ്ങൾ കുറയ്ക്കുമെന്നും വാഹനാപകടങ്ങൾ ഒഴിവാക്കാൻ സഹായിക്കുമെന്നും പ്രീമിയർ ഡേവിഡ് എബി വ്യക്തമാക്കി.

2019-ൽ നടത്തിയ സർവ്വേയിൽ 93 ശതമാനം ആളുകളും സമയമാറ്റം അവസാനിപ്പിക്കുന്നതിനെ പിന്തുണച്ചിരുന്നു. യുകോൺ (Yukon) പ്രവിശ്യ നിലവിൽ ഈ രീതിയാണ് പിന്തുടരുന്നത്. എന്നാൽ അയൽരാജ്യമായ അമേരിക്കയിലെ സംസ്ഥാനങ്ങളുമായുള്ള സമയവ്യത്യാസം വ്യാപാരത്തെയും വിമാന സർവീസുകളെയും ബാധിക്കുമെന്ന് വാങ്കുവർ എയർപോർട്ട് അതോറിറ്റിയും ഗ്രേറ്റർ വാങ്കുവർ ബോർഡ് ഓഫ് ട്രേഡും ആശങ്ക പ്രകടിപ്പിച്ചു.

ബ്രിട്ടീഷ് കൊളംബിയയുടെ തീരുമാനത്തിന് പിന്നാലെ ആൽബെർട്ടയും തങ്ങളുടെ സമയക്രമം പുനഃപരിശോധിക്കുകയാണ്. അയൽ പ്രവിശ്യകളായ സസ്‌കാച്ചുവനും ബ്രിട്ടീഷ് കൊളംബിയയും സമയമാറ്റം അവസാനിപ്പിച്ച സാഹചര്യത്തിൽ, പടിഞ്ഞാറൻ പ്രവിശ്യകളിൽ ഒരേ സമയക്രമം കൊണ്ടുവരുന്നത് ഗുണകരമാകുമോ എന്ന് പഠിക്കുമെന്ന് ആൽബെർട്ട പ്രീമിയർ ഡാനിയൽ സ്മിത്ത് അറിയിച്ചു.

നേരത്തെ 2021-ൽ നടത്തിയ ഹിതപരിശോധനയിൽ ആൽബെർട്ടയിലെ ജനങ്ങൾ സമയമാറ്റം തുടരുന്നതിനെയാണ് പിന്തുണച്ചിരുന്നത്. എന്നാൽ ബ്രിട്ടീഷ് കൊളംബിയയുടെ പുതിയ നീക്കത്തോടെ ആൽബെർട്ടയിലും ഈ ചർച്ചകൾ വീണ്ടും സജീവമായിരിക്കുകയാണ്.