ചുമയ്ക്കുള്ള മരുന്നുകളുടെ ദുരുപയോഗം: നിയന്ത്രണമേർപ്പെടുത്താൻ ആൽബർട്ട പോലീസ്

തെക്കൻ ആൽബർട്ടയിലെ ടാബർ നഗരത്തിൽ, പ്രിസ്ക്രിപ്ഷൻ കൂടാതെ ലഭിക്കുന്ന ചുമയ്ക്കുള്ള മരുന്നുകളുടെ  ദുരുപയോഗവും അനുബന്ധ കുറ്റകൃത്യങ്ങളും വർദ്ധിക്കുന്ന സാഹചര്യത്തിൽ പോലീസ് നിയന്ത്രണങ്ങൾ കർശനമാക്കുന്നു. 'ഡെക്സ്ട്രോമെത്തോർഫാൻ' (DXM) അടങ്ങിയ മരുന്നുകൾ മോഷ്ടിക്കപ്പെടുന്ന സംഭവങ്ങൾ വർദ്ധിച്ചതായും ഇവ ലഹരിക്കായി ഉപയോഗിക്കുന്നത് ഗുരുതരമായ ആരോഗ്യപ്രശ്നങ്ങൾക്ക് കാരണമാകുന്നതായും ടാബർ പോലീസ് സോഷ്യൽ മീഡിയയിലൂടെ അറിയിച്ചു. ഈ സാഹചര്യം കണക്കിലെടുത്ത്, അത്തരം മരുന്നുകൾ സ്റ്റോറുകളിലെ കൗണ്ടറുകൾക്ക് പിന്നിൽ സൂക്ഷിക്കാനും മുതിർന്നവർക്ക് മാത്രം വിൽക്കാനും വ്യാപാരികളോട് പോലീസ് അഭ്യർത്ഥിച്ചു. ആൽബർട്ട കോളേജ് ഓഫ് ഫാർമസിയും ഈ നിർദ്ദേശത്തെ പിന്തുണയ്ക്കുകയും മരുന്നുകളുടെ വിപണനത്തിൽ കൂടുതൽ മുൻകരുതലുകൾ എടുക്കാൻ ഫാർമസികളോട് ആവശ്യപ്പെടുകയും ചെയ്തിട്ടുണ്ട്.

അമിത അളവിൽ ഈ മരുന്നുകൾ ഉപയോഗിക്കുന്നത് ഹൃദയമിടിപ്പ് വർദ്ധിക്കാനും വിറയൽ, കാഴ്ച മങ്ങൽ, ഓർമ്മക്കുറവ്, എന്നിവയ്ക്കും കാരണമാകുമെന്ന് ആരോഗ്യവിദഗ്ധർ മുന്നറിയിപ്പ് നൽകുന്നു. പലപ്പോഴും അസറ്റാമിനോഫിൻ പോലുള്ള ഘടകങ്ങൾ അടങ്ങിയ ഇത്തരം മരുന്നുകൾ വലിയ അളവിൽ ഉള്ളിൽ ചെല്ലുന്നത് കരൾ തകരാറിലാകാനും മരണത്തിനും വരെ ഇടയാക്കിയേക്കാം. കൗമാരക്കാരുടെ പെരുമാറ്റത്തിലുണ്ടാകുന്ന മാറ്റങ്ങൾ ശ്രദ്ധിക്കണമെന്നും വീട്ടിലെ മരുന്നുകളുടെ ശേഖരം സുരക്ഷിതമായി സൂക്ഷിക്കണമെന്നും പോലീസ് രക്ഷിതാക്കളോട് നിർദ്ദേശിച്ചു. ലഹരി ലക്ഷ്യമിട്ടുള്ള മരുന്നുകളുടെ വിപണനവും മോഷണവും തടയാൻ കമ്മ്യൂണിറ്റി തലത്തിൽ ബോധവൽക്കരണം ശക്തമാക്കാനാണ് പോലീസ് ലക്ഷ്യമിടുന്നത്.