പുതിയ ബജറ്റിലെ പ്രോപ്പർട്ടി ടാക്സ് വർദ്ധന കാൽഗറി നിവാസികൾക്ക് നിവാസികൾക്ക് തിരിച്ചടിയാകുമെന്ന് റിപ്പോർട്ട്

ആൽബെർട്ട സർക്കാർ അവതരിപ്പിച്ച പുതിയ ബജറ്റിൽ പ്രോപ്പർട്ടി ടാക്സ് വർദ്ധിപ്പിച്ചത് കാൽഗറി നിവാസികൾക്ക് വലിയ സാമ്പത്തിക ബാധ്യതയാകുന്നു. നഗരസഭ നിശ്ചയിച്ച നികുതി വർധനവിനേക്കാൾ വളരെ കൂടുതലാണ് സർക്കാർ ഏർപ്പെടുത്തിയ പുതിയ നിരക്കുകൾ.

ശരാശരി കാൽഗറി വീട്ടുടമയ്ക്ക് പ്രതിമാസം ഏകദേശം 28 ഡോളർ അധികം നൽകേണ്ടി വരും. കഴിഞ്ഞ വർഷം ഇത് 19 ഡോളർ ആയിരുന്നു. എന്നാൽ, നഗരസഭയുടെ ഈ വർഷത്തെ നികുതി വർധനവ് പ്രതിമാസം 4.50 ഡോളർ മാത്രമാണ്. അതായത്, നഗരസഭയുടേതിനേക്കാൾ വലിയ വർധനവാണ് പ്രവിശ്യാ സർക്കാർ പ്രഖ്യാപിച്ചിട്ടുള്ളത്.

ഈ പണം സർക്കാർ എങ്ങനെയെല്ലാം ഉപയോഗിക്കുന്നുവെന്ന് വ്യക്തമാക്കണമെന്ന് മേയർ ജെറോമി ഫാർകാസ് ആവശ്യപ്പെട്ടു. കാൽഗറിക്ക് അർഹമായ നിക്ഷേപങ്ങൾ തിരികെ ലഭിക്കുന്നുണ്ടോ എന്ന് തെളിയിക്കണമെന്നും അദ്ദേഹം പറഞ്ഞു. കാൽഗറിയിലെ പഴക്കം ചെന്ന ജലവിതരണ പൈപ്പുകൾ നന്നാക്കുന്നത് പോലുള്ള അടിയന്തിര ആവശ്യങ്ങൾക്കായി ബജറ്റിൽ പുതിയ പണം അനുവദിച്ചിട്ടില്ലെന്നും മേയർ ചൂണ്ടിക്കാട്ടി.

എന്നാൽ, പ്രോപ്പർട്ടി ടാക്സ് പിരിക്കുന്നത് നഗരസഭകളാണെങ്കിലും അതിന്റെ നിരക്ക് തീരുമാനിക്കുന്നത് പ്രവിശ്യാ സർക്കാരാണെന്നും, ഈ സംവിധാനത്തിൽ മാറ്റമുണ്ടാകില്ലെന്നും ധനകാര്യ മന്ത്രി നേറ്റ് ഹോർണർ വ്യക്തമാക്കി. സ്കൂളുകൾ, പൊതുഗതാഗതം, ആരോഗ്യ മേഖല എന്നിവയ്ക്കായി ബജറ്റിൽ ഫണ്ടുകൾ അനുവദിച്ചിട്ടുണ്ടെങ്കിലും, പുതിയ നികുതി വർധനവ് സാധാരണക്കാരെയും ചെറുകിട ബിസിനസ്സുകളെയും വലിയ തോതിൽ ബാധിക്കുമെന്ന് ബിസിനസ്സ് നേതാക്കൾ മുന്നറിയിപ്പ് നൽകുന്നു.