9.4 ബില്യൺ ഡോളറിൻ്റെ കമ്മി, സാമ്പത്തിക പ്രതിസന്ധിയുടെ സൂചനകളുമായി ആൽബർട്ടയുടെ പുതിയ ബജറ്റ്

 

സാമ്പത്തിക പ്രതിസന്ധിയുടെ സൂചനകളുമായി ആൽബർട്ടയുടെ പുതിയ ബജറ്റ് . 9.4 ബില്യൺ ഡോളറിന്റെ ഭീമമായ കമ്മിയാണ് ബജറ്റിൽ രേഖപ്പെടുത്തിയിരിക്കുന്നത്. ഇത്തവണ കമ്മി വളരെ വലുതായിരിക്കുമെന്ന് പ്രീമിയർ ഡാനിയൽ സ്മിത്ത് നേരത്തെ തന്നെ മുന്നറിയിപ്പ് നൽകിയിരുന്നു. 

ബജറ്റ് കണക്കുകൾ പ്രകാരം 74.6 ബില്യൺ ഡോളർ വരുമാനമാണ് സർക്കാർ പ്രതീക്ഷിക്കുന്നത്. എന്നാൽ കണ്ടിൻജൻസി ഫണ്ട് അടക്കം 83.9 ബില്യൺ ഡോളർ ചെലവുവരുമെന്നാണ് കണക്കാക്കപ്പെടുന്നത്. കോവിഡ്-19 കാലഘട്ടത്തിനു ശേഷമുള്ള ആൽബർട്ടയുടെ ഏറ്റവും വലിയ ബജറ്റ് കമ്മി കൂടിയാണിത്. 2020-21 വർഷത്തിൽ ഏകദേശം 17 ബില്യൺ ഡോളറിന്റെ കമ്മി പ്രവിശ്യ നേരിട്ടിരുന്നു.

വരും വർഷങ്ങളിലും ഈ സാമ്പത്തിക പ്രതിസന്ധി തുടരുമെന്നതാണ് ആശങ്കയുണ്ടാക്കുന്നത്. 2027-ൽ 7.6 ബില്യൺ ഡോളറും, 2028-ൽ 6.9 ബില്യൺ ഡോളറും കമ്മി പ്രതീക്ഷിക്കുന്നു. കടബാധ്യതകൾ ഇനിയും കുതിച്ചുയരുമെന്ന് കണക്കുകൾ പറയുന്നു. 2026-ൽ 109 ബില്യൺ ഡോളറിലെത്തുന്ന കടം, 2029-ഓടെ 138 ബില്യൺ ഡോളറിലേക്ക് എത്താനാണ് സാധ്യത.

എണ്ണവിലയിലെ ഇടിവാണ് വരുമാനക്കുറവിന് പ്രധാന കാരണമായി സർക്കാർ ചൂണ്ടിക്കാട്ടുന്നത്. കൂടാതെ, ജനസംഖ്യാ വർധനവ് മൂലം ആരോഗ്യ, വിദ്യാഭ്യാസ മേഖലകളിൽ ചെലവ് വർദ്ധിച്ചതും ബജറ്റിനെ ബാധിച്ചിട്ടുണ്ട്. എന്നാൽ, ബജറ്റ് സന്തുലിതമാക്കാൻ സർക്കാരിന് കൃത്യമായ പദ്ധതിയൊന്നുമില്ലെന്ന് പ്രതിപക്ഷം വിമർശനം ഉന്നയിക്കുന്നു. വരും നാളുകളിൽ ആൽബർട്ട ഏറെ വെല്ലുവിളികൾ നിറഞ്ഞ സാമ്പത്തിക സാഹചര്യത്തിലൂടെയാകും കടന്നുപോകുക.