കെൻഡാമിൽ ബേബി ഫോർമുല വിപണിയിൽ നിന്ന് പിൻവലിക്കുന്നു; വിഷാംശം കണ്ടെത്തിയതായി മുന്നറിയിപ്പ്

കാനഡയിലെ കോസ്റ്റ്കോ സ്റ്റോറുകളിലും ഓൺലൈനായും വിതരണം ചെയ്യുന്ന 'കെൻഡാമിൽ' ബ്രാൻഡ് ബേബി ഫോർമുലയിൽ വിഷാംശത്തിൻ്റെ സാന്നിധ്യം കണ്ടെത്തിയതിനെത്തുടർന്ന് കനേഡിയൻ ഫുഡ് ഇൻസ്പെക്ഷൻ ഏജൻസി  ഉൽപ്പന്നം വിപണിയിൽ നിന്ന് പിൻവലിക്കാൻ ഉത്തരവിട്ടു. ഒരു കിലോഗ്രാം പാക്കറ്റുകളിൽ ലഭ്യമായ "With Whole Milk" എന്ന് ലേബൽ ചെയ്ത ഫോർമുലയിൽ 'സെറൂലൈഡ്' എന്ന വിഷാംശം അടങ്ങിയിരിക്കാൻ സാധ്യതയുണ്ടെന്നാണ് കണ്ടെത്തൽ. ഇത് കുട്ടികളിൽ പെട്ടെന്നുള്ള ഛർദ്ദിക്കും ഓക്കാനത്തിനും കാരണമായേക്കാം.

ബാക്ടീരിയകളെ നശിപ്പിക്കുന്ന സാധാരണ താപനിലയെ പ്രതിരോധിക്കാൻ ശേഷിയുള്ള ഈ വിഷാംശം ചൂടാക്കിയാലും നശിക്കില്ല എന്നത് ഗൗരവം വർദ്ധിപ്പിക്കുന്നു. മറ്റ് രാജ്യങ്ങളിൽ റിപ്പോർട്ട് ചെയ്യപ്പെട്ട സമാനമായ സാഹചര്യത്തെത്തുടർന്നാണ് കാനഡയിലും ജാഗ്രതാ നിർദ്ദേശം പുറപ്പെടുവിച്ചത്. 2025 മെയ് മാസത്തിൽ ഉല്പാദിപ്പിച്ച ബാച്ചുകളായ 897274, 888632 എന്നിവയാണ് നിലവിൽ പിൻവലിച്ചിരിക്കുന്നത്; ഇവയുടെ കോഡുകൾ ടിന്നിൻ്റെ അടിഭാഗത്ത് പരിശോധിക്കാവുന്നതാണ്.

ഫോർമുല നിർമ്മാണത്തിനാവശ്യമായ ഓയിൽ വിതരണത്തിലുണ്ടായ തടസ്സത്തെത്തുടർന്ന് താൽക്കാലികമായി ഉപയോഗിച്ച പുതിയ ചേരുവയാണ് ഈ വിഷാംശത്തിന് കാരണമായതെന്ന് കമ്പനി അധികൃതർ വ്യക്തമാക്കി. നിലവിൽ ആർക്കും ആരോഗ്യപ്രശ്നങ്ങൾ റിപ്പോർട്ട് ചെയ്തിട്ടില്ലെങ്കിലും, സുരക്ഷാ മുൻകരുതലിൻ്റെ ഭാഗമായി ഈ ഉൽപ്പന്നം ഉപയോഗിക്കുന്നത് ഉടൻ നിർത്തണമെന്നും വാങ്ങിയ സ്ഥലത്ത് തിരികെ നൽകി പണം കൈപ്പറ്റണമെന്നും അധികൃതർ അറിയിച്ചു.