ടൊറൻ്റോയിലെ റിയൽ എസ്റ്റേറ്റ് വിപണിയിൽ കടുത്ത വിലയിടിവ്: ഫ്ലാറ്റ് നിക്ഷേപകർ പ്രതിസന്ധിയിൽ

 

 

ടൊറൻ്റോയിലെ പ്രീ-കൺസ്ട്രക്ഷൻ കോണ്ടോമിനിയം വിപണിയിൽ വില ഗണ്യമായി ഇടിഞ്ഞതോടെ, നിർമ്മാണം പൂർത്തിയാകുന്നതിന് മുൻപേ പണമടച്ച് ബുക്ക് ചെയ്ത നൂറുകണക്കിന് നിക്ഷേപകർ വൻ സാമ്പത്തിക പ്രതിസന്ധി നേരിടുന്നു. വർഷങ്ങൾക്ക് മുൻപ് ഉയർന്ന വിലയ്ക്ക് കരാർ ഉറപ്പിച്ച യൂണിറ്റുകളുടെ ഇപ്പോഴത്തെ വിപണി മൂല്യം കുത്തനെ താഴ്ന്നതാണ് വിനയായത്. 2022-ലെ ഏറ്റവും ഉയർന്ന നിരക്കിൽ നിന്നും ഏകദേശം 25 ശതമാനത്തോളം വിലയിടിവാണ് ഈ മേഖലയിൽ രേഖപ്പെടുത്തിയിരിക്കുന്നത്.

വസ്തുവിൻ്റെ മൂല്യം കുറഞ്ഞ സാഹചര്യത്തിൽ, ബാങ്കുകൾ മുൻ നിശ്ചയിച്ച തുകയ്ക്ക് വായ്പ നൽകാൻ വിസമ്മതിക്കുന്നത് ഇടപാടുകാരെ കൂടുതൽ തളർത്തുന്നു. അഞ്ച് വർഷം മുൻപ് വോഗനിൽ 675,000 ഡോളറിന് അപ്പാർട്ട്‌മെൻ്റ് ബുക്ക് ചെയ്ത വിറ്റർ അൽമേഡ എന്ന നിക്ഷേപകൻ്റെ അനുഭവം ഈ പ്രതിസന്ധിയുടെ നേർചിത്രമാണ്. നിലവിൽ ഇതിൻ്റെ വിപണി മൂല്യം 590,000 ഡോളറായി താഴ്ന്നതോടെ ബാങ്കുകൾ വായ്പ നിഷേധിക്കുകയും, കരാറിൽ നിന്ന് പിന്മാറിയാൽ വൻ തുക നഷ്ടപരിഹാരം നൽകേണ്ടി വരുമെന്ന് നിർമ്മാതാക്കൾ ഭീഷണിപ്പെടുത്തുകയും ചെയ്യുന്ന സാഹചര്യമാണുള്ളത്. 2026-ൽ നിർമ്മാണം പൂർത്തിയാകുന്ന ഏകദേശം 28,000-ഓളം യൂണിറ്റുകൾ ഇത്തരത്തിൽ വിപണി വിലയേക്കാൾ ഉയർന്ന തുകയ്ക്ക് വാങ്ങേണ്ടി വരുമെന്നാണ് വിദഗ്ദ്ധർ ചൂണ്ടിക്കാട്ടുന്നത്. നിക്ഷേപകർക്ക് തങ്ങളുടെ മുൻകൂർ തുക നഷ്ടപ്പെടുമെന്ന് മാത്രമല്ല, നിയമനടപടികൾ നേരിടേണ്ടി വരുമെന്ന ആശങ്കയും ഉയർന്നിട്ടുണ്ട്.