ആൽബർട്ടയിൽ നിയമസഭാസമ്മേളനത്തിന് തുടക്കം, കുടിയേറ്റ നിയന്ത്രണം, വൈദ്യസഹായത്തോടെയുള്ള മരണം തുടങ്ങിയ നിർണ്ണായക ബില്ലുകൾ ഈ സമ്മേളനത്തിൽ അവതരിപ്പിച്ചേക്കും

 

കുടിയേറ്റ നിയന്ത്രണം, വൈദ്യസഹായത്തോടെയുള്ള മരണം എന്നിവയുൾപ്പെടെയുള്ള ബില്ലുകൾ ആൽബർട്ട നിയമസഭയുടെ ഈ സമ്മേളനത്തിൽ അവതരിപ്പിക്കുമെന്ന് യുണൈറ്റഡ് കൺസർവേറ്റീവ് പാർട്ടി സർക്കാർ അറിയിച്ചു.
വരാനിരിക്കുന്ന വ്യാഴാഴ്ച  പുതിയ ബജറ്റും അവതരിപ്പിക്കും. നിയമസഭയുടെ ഈ സ്പ്രിംഗ് സെഷൻ മെയ് മാസം വരെ നീണ്ടുനിൽക്കുമെന്നാണ് കരുതുന്നത്.

വിദേശങ്ങളിൽ നിന്ന് ആളുകളെ ജോലിക്ക് എത്തിക്കുന്ന റിക്രൂട്ടർമാർക്കും ഇമിഗ്രേഷൻ കൺസൾട്ടന്റുമാർക്കും ഇനി മുതൽ ലൈസൻസ് നിർബന്ധമാക്കുന്ന പുതിയ ബിൽ ഈ സമ്മേളനത്തിൽ അവതരിപ്പിച്ചേക്കും. തൊഴിലാളികളെ ചൂഷണം ചെയ്യുന്നത് തടയാനും തൊഴിലുടമകളുടെ മേൽ കൃത്യമായ നിരീക്ഷണം ഉറപ്പാക്കാനും ഇതിലൂടെ ലക്ഷ്യമിടുന്നു. ഒക്ടോബറിൽ നടക്കാനിരിക്കുന്ന ജനഹിതപരിശോധനയ്ക്ക് മുന്നോടിയായിട്ടുള്ള ശക്തമായ നീക്കമാണിത്.   കൂടാതെ, ആൽബർട്ടയിൽ വൈദ്യസഹായത്തോടെയുള്ള മരണം നടപ്പിലാക്കുന്ന രീതി നിയന്ത്രിക്കാനും സർക്കാർ ലക്ഷ്യമിടുന്നുണ്ട്.  കൃത്യമായ മേൽനോട്ടം ഉറപ്പാക്കുകയാണ് ഇതിലൂടെ ലക്ഷ്യമിടുന്നത്. പ്രായപൂർത്തിയാകാത്തവർക്കും മാനസികരോഗത്തെ തുടർന്ന് മരണം ആഗ്രഹിക്കുന്നവർക്കും ആൽബർട്ടയിൽ ഇനി മുതൽ ഈ സൗകര്യം അനുവദിക്കില്ലെന്ന് ഗവൺമെന്റ് ഹൗസ് ലീഡർ ജോസഫ് ഷോ വ്യക്തമാക്കി.

നഗരസഭകൾക്ക് കൂടുതൽ മികച്ച പോലീസ് സുരക്ഷാ സംവിധാനങ്ങൾ ലഭ്യമാക്കുന്നതിനായി ഷെരീഫ് പോലീസ് സർവീസിനെ ശക്തിപ്പെടുത്തുന്ന പുതിയ ബില്ലും ഈ സമ്മേളനത്തിൽ എത്തും. എല്ലാവരും ഉറ്റുനോക്കുന്ന ആൽബർട്ടയുടെ പുതിയ ബജറ്റ് വരാനിരിക്കുന്ന വ്യാഴാഴ്ച അവതരിപ്പിക്കും. പ്രവിശ്യയുടെ സാമ്പത്തിക ഭദ്രതയും വികസനവും മുൻനിർത്തിയുള്ള പ്രഖ്യാപനങ്ങൾ ഇതിലുണ്ടാകുമെന്നാണ് കരുതുന്നത്. ടൂറിസം മേഖലയുടെ ഉണർവിനും ഭരണപരമായ തടസ്സങ്ങൾ (Red tape) ഒഴിവാക്കുന്നതിനുമുള്ള വിവിധ ബില്ലുകളും ചർച്ചയ്ക്ക് എത്തും. മെയ് മാസം വരെ നീണ്ടുനിൽക്കുന്ന ഈ  സമ്മേളനം ആൽബർട്ടയുടെ രാഷ്ട്രീയ-സാമൂഹിക മേഖലകളിൽ വലിയ മാറ്റങ്ങൾക്കും ചർച്ചകൾക്കും വഴിതുറക്കും.