സുഹൃത്തുക്കള്ക്കൊപ്പം തോക്ക് ഉപയോഗിച്ച് കളിക്കുന്നതിനിടെ അപകടം; 14 വയസ്സുകാരന് വെടിയേറ്റ് മരിച്ചു
By: 600002 On: Feb 23, 2026, 9:28 AM
പി പി ചെറിയാന്
ആര്ലിംഗ്ടണ്: ടെക്സസിലുള്ള അര്ലിംഗ്ടണില് സുഹൃത്തുക്കള്ക്കൊപ്പം തോക്ക് ഉപയോഗിച്ച് കളിക്കുന്നതിനിടെ അബദ്ധത്തില് വെടിയേറ്റ് 14 വയസ്സുകാരന് മരിച്ചു. വെള്ളിയാഴ്ച രാത്രി പത്തരയോടെ അര്ലിംഗ്ടണിലെ ഒരു വീട്ടിലാണ് സംഭവം നടന്നത്.
ഒരു സംഘം കൗമാരക്കാര് ചേര്ന്ന് വീട്ടിലിരുന്ന് പരസ്പരം തോക്ക് ചൂണ്ടി കളിക്കുന്നതിനിടെയാണ് വെടിപൊട്ടിയതെന്ന് പോലീസ് പറഞ്ഞു. റിലി ജോര്ദാന് എന്ന 14 വയസ്സുകാരനാണ് സംഭവസ്ഥലത്ത് വെച്ച് തന്നെ മരിച്ചത്.
മുറിയിലുണ്ടായിരുന്ന സുഹൃത്തുക്കളില് ഒരാളാണ് വെടിവെച്ചതെന്ന് കണ്ടെത്തിയതിനെത്തുടര്ന്ന് ഇയാളെ മനഃപൂര്വ്വമല്ലാത്ത നരഹത്യയ്ക്ക് കേസെടുത്ത് പോലീസ് അറസ്റ്റ് ചെയ്തു. പ്രതിയെ ടാറന്റ് കൗണ്ടി ജുവനൈല് ഡിറ്റന്ഷന് സെന്ററിലേക്ക് മാറ്റി.
കുട്ടികള്ക്ക് ഈ തോക്ക് എവിടെ നിന്ന് ലഭിച്ചു എന്നതിനെക്കുറിച്ച് പോലീസ് വിശദമായ അന്വേഷണം നടത്തിവരികയാണ്. സുരക്ഷാ കാരണങ്ങളാല് പ്രതിയുടെ പേരുവിവരങ്ങള് പോലീസ് പുറത്തുവിട്ടിട്ടില്ല.
വീടുകളില് തോക്കുകള് സൂക്ഷിക്കുമ്പോള് പാലിക്കേണ്ട ജാഗ്രതയെക്കുറിച്ചും കുട്ടികളുടെ കൈകളില് ഇത്തരം മാരകായുധങ്ങള് എത്തുന്നതിനെക്കുറിച്ചും പോലീസ് കടുത്ത മുന്നറിയിപ്പ് നല്കി.