താൽക്കാലിക താമസക്കാർക്ക് പൂർണ്ണ ആനുകൂല്യങ്ങൾ നൽകാനാവില്ലെന്ന് ആൽബർട്ട പ്രീമിയർ; ഹിതപരിശോധനയ്ക്ക് നീക്കം

ആൽബർട്ടയിലെ താൽക്കാലിക താമസക്കാർക്ക് സർക്കാർ ആനുകൂല്യങ്ങൾ പരിമിതപ്പെടുത്തണമെന്ന നിർദ്ദേശവുമായി പ്രീമിയർ ഡാനിയൽ സ്മിത്ത് രംഗത്തെത്തി. പ്രവിശ്യയിലെ ആരോഗ്യ സംരക്ഷണം, വിദ്യാഭ്യാസം, സാമൂഹിക സേവനങ്ങൾ എന്നിവയുടെ വർദ്ധിച്ചുവരുന്ന ചിലവ് സർക്കാരിന് വലിയ സാമ്പത്തിക ബാധ്യതയുണ്ടാക്കുന്നുണ്ടെന്ന് സ്മിത്ത് വാർത്താ സമ്മേളനത്തിൽ വ്യക്തമാക്കി. കനേഡിയൻ പൗരന്മാർക്കും സ്ഥിരതാമസക്കാർക്കും (Permanent Residents) മുൻഗണന നൽകുന്നതിനായി, താൽക്കാലിക വിദേശ തൊഴിലാളികൾക്കും അന്താരാഷ്ട്ര വിദ്യാർത്ഥികൾക്കും ആനുകൂല്യങ്ങൾ നൽകുന്നതിൽ കർശന നിയന്ത്രണങ്ങൾ ഏർപ്പെടുത്താനാണ് സർക്കാർ ലക്ഷ്യമിടുന്നത്. ഈ വിഷയത്തിൽ ഒക്ടോബർ 19-ന് പ്രവിശ്യയിൽ ഹിതപരിശോധന നടത്തുമെന്നും അവർ അറിയിച്ചു.

എന്നാൽ, സർക്കാരിൻ്റെ ഈ നീക്കം വംശീയ വിദ്വേഷത്തിനും വിദേശികളോടുള്ള വിവേചനത്തിനും വഴിതെളിക്കുമെന്ന് ആരോഗ്യ വിദഗ്ധരും കുടിയേറ്റ നിയമവിദഗ്ധരും മുന്നറിയിപ്പ് നൽകുന്നു. ആൽബർട്ടയിലെ സാമ്പത്തിക പ്രതിസന്ധിക്ക് കാരണം എണ്ണവിലയിലുണ്ടായ 30 ശതമാനത്തോളം ഇടിവാണെന്നും അതിന് കുടിയേറ്റക്കാരെ പഴിചാരുന്നത് ശരിയല്ലെന്നും ഇവർ ചൂണ്ടിക്കാട്ടി. 2021-ന് ശേഷം കാനഡയിലുണ്ടായ ജനസംഖ്യാ വളർച്ചയുടെ ആറിലൊന്നും ആൽബർട്ടയിലായിരുന്നു എന്നാണ് സ്ഥിതിവിവരക്കണക്കുകൾ വ്യക്തമാക്കുന്നത്. പ്രവിശ്യയിലെ വർദ്ധിച്ചുവരുന്ന സാമ്പത്തിക കമ്മി പരിഹരിക്കാൻ കുടിയേറ്റ നയങ്ങളിൽ മാറ്റം അനിവാര്യമാണെന്നാണ് സർക്കാർ നിലപാട്.