ബ്രിട്ടീഷ് കൊളംബിയയിൽ പ്രസവചികിത്സാ പ്രതിസന്ധി: ജീവനക്കാരുടെ കുറവ് മൂലം ആശുപത്രികൾ അടച്ചുപൂട്ടുന്നു

 

കാനഡയിലെ ബ്രിട്ടീഷ് കൊളംബിയയിൽ പ്രസവചികിത്സാ മേഖല (Maternity Care) കടുത്ത പ്രതിസന്ധി നേരിടുകയാണ്. ജീവനക്കാരുടെ അഭാവം മൂലം വൈറ്റ് റോക്കിലെ പീസ് ആർച്ച് ഹോസ്പിറ്റലിലെ പ്രസവചികിത്സാ വിഭാഗം വീണ്ടും അടച്ചുപൂട്ടേണ്ടി വന്നത് ജനങ്ങൾക്കിടയിൽ വലിയ ആശങ്കയുണ്ടാക്കിയിട്ടുണ്ട്.

ജീവനക്കാർ അപ്രതീക്ഷിതമായി ജോലി ഒഴിഞ്ഞുപോയതിനെത്തുടർന്ന് നാല് ദിവസത്തേക്കാണ് ഇത്തവണ പീസ് ആർച്ച് ഹോസ്പിറ്റലിലെ മെറ്റേണിറ്റി യൂണിറ്റ് അടച്ചത്. ഈ വർഷം മാത്രം നാലാം തവണയാണ് ഇവിടെ ഇത്തരത്തിൽ സേവനം തടസ്സപ്പെടുന്നത്. ഇതേത്തുടർന്ന് ചികിത്സയിലായിരുന്ന ഗർഭിണികളെയും മറ്റ് രോഗികളെയും ദൂരെയുള്ള മറ്റ് ആശുപത്രികളിലേക്ക് മാറ്റേണ്ടി വന്നു. പീസ് ആർച്ച് ഹോസ്പിറ്റൽ കൂടാതെ റിഡ്ജ് മെഡോസ് ഹോസ്പിറ്റലിലും സമാനമായ രീതിയിൽ പ്രസവചികിത്സാ വിഭാഗം അടച്ചുപൂട്ടുന്ന സാഹചര്യം ഉണ്ടായിട്ടുണ്ട്.

ഇതൊരു പ്രാദേശിക പ്രശ്നമല്ലെന്നും പ്രവിശ്യയിലുടനീളമുള്ള ഗുരുതരമായ അവസ്ഥയാണെന്നും 'ഡോക്ടേഴ്സ് ഓഫ് ബിസി' (Doctors of BC) വ്യക്തമാക്കുന്നു. ഗൈനക്കോളജിസ്റ്റുകൾ (OBGYNs), മിഡ്‌വൈഫുമാർ, നഴ്‌സുമാർ എന്നിവരുടെ എണ്ണത്തിൽ വലിയ കുറവുണ്ട്.മുൻകാലങ്ങളിൽ ഫാമിലി ഡോക്ടർമാർ പ്രസവചികിത്സയിൽ സജീവമായി ഇടപെട്ടിരുന്നുവെങ്കിൽ, ഇപ്പോൾ അത്തരക്കാരുടെ എണ്ണവും കുറയുകയാണ്. ജനസംഖ്യ കൂടുന്നതിനനുസരിച്ച് പുതിയ ഡോക്ടർമാരുടെ എണ്ണത്തിൽ വർദ്ധനവ് ഉണ്ടാകാത്തത് ആരോഗ്യരംഗത്തെ സമ്മർദ്ദം ഇരട്ടിയാക്കുന്നു.

ഹെൽത്ത് കെയർ സിസ്റ്റം കടുത്ത സമ്മർദ്ദത്തിലാണെന്നും അടിയന്തര പരിഹാരങ്ങൾ ആവശ്യമാണെന്നും ഡോക്ടേഴ്സ് ഓഫ് ബിസി പ്രസിഡൻ്റെ ഡോ. ആദം തോംസൺ മുന്നറിയിപ്പ് നൽകുന്നു. പുതിയ ഡോക്ടർമാരെ നിയമിക്കുന്നതിനൊപ്പം നിലവിലുള്ളവർ ജോലി ഉപേക്ഷിച്ചു പോകാതിരിക്കാനുള്ള നടപടികൾ സ്വീകരിക്കണമെന്നും അദ്ദേഹം ആവശ്യപ്പെട്ടു.ഡോക്ടർമാർക്ക് വിവിധ ആരോഗ്യ അതോറിറ്റികൾക്ക് കീഴിൽ തടസ്സങ്ങളില്ലാതെ ജോലി ചെയ്യാൻ സാധിക്കുന്ന രീതിയിൽ നിയമങ്ങൾ പരിഷ്കരിക്കണമെന്നും നിർദ്ദേശമുണ്ട്. ഫ്രേസർ ഹെൽത്ത് ആറ് പുതിയ ഗൈനക്കോളജിസ്റ്റുകളെ നിയമിച്ചിട്ടുണ്ടെങ്കിലും, ഇത്തരം താൽക്കാലിക പരിഹാരങ്ങൾ കൊണ്ട് മാത്രം പ്രശ്നം തീരില്ലെന്നും ദീർഘകാലാടിസ്ഥാനത്തിലുള്ള മാറ്റങ്ങൾ വേണമെന്നുമാണ് വിദഗ്ധരുടെ പക്ഷം.