ആരോഗ്യകാരണങ്ങളാൽ നാടുകടത്തൽ തടഞ്ഞു; ലെബനീസ് സ്വദേശിക്ക് കാനഡയിൽ താൽക്കാലിക ആശ്വാസം

ഫെൻ്റാനിൽ  ഉൾപ്പെടെയുള്ള മയക്കുമരുന്നുകൾ കടത്തിയതിന് ശിക്ഷിക്കപ്പെട്ട ലെബനീസ് പൗരൻ മുഹമ്മദ് കസാറിനെ നാടുകടത്താനുള്ള ഉത്തരവ് കനേഡിയൻ ഫെഡറൽ കോടതി തടഞ്ഞു. ശ്വാസകോശാർബുദത്തിന്റെ പ്രാരംഭ ലക്ഷണങ്ങൾ കണ്ടെത്തിയ സാഹചര്യത്തിൽ, മാനുഷിക പരിഗണന മുൻനിർത്തിയാണ് ജസ്റ്റിസ് ആംഗസ് ഗ്രാന്റ് ഈ ഉത്തരവിട്ടത്.

35 വർഷമായി കാനഡയിൽ സ്ഥിരതാമസക്കാരനായ കസാറിനെ ഫെബ്രുവരി 13-ന് നാടുകടത്താനായിരുന്നു നേരത്തെ തീരുമാനിച്ചിരുന്നത്. എന്നാൽ, നിലവിലെ ഗുരുതരമായ ആരോഗ്യസ്ഥിതിയിൽ ചികിത്സ തടസ്സപ്പെടുന്നത് മരണത്തിന് വരെ കാരണമായേക്കാമെന്ന മെഡിക്കൽ റിപ്പോർട്ടുകൾ കോടതി ശരിവെക്കുകയായിരുന്നു. ലെബനനിലെ തകർച്ചയുടെ വക്കിലെത്തിനിൽക്കുന്ന ആരോഗ്യപരിരക്ഷാ സംവിധാനം കസാറിന് ആവശ്യമായ വിദഗ്ധ ചികിത്സ ഉറപ്പാക്കാൻ പ്രാപ്തമല്ലെന്ന് കോടതി നിരീക്ഷിച്ചു. രാജ്യം നേരിടുന്ന ഒപ്പിയോയിഡ്  പ്രതിസന്ധിയിൽ മയക്കുമരുന്ന് കടത്തുകാർക്ക് പങ്കുണ്ടെന്നത് ഗൗരവകരമായ കാര്യമാണെങ്കിലും, പ്രതിയുടെ ജീവിക്കാനുള്ള അവകാശത്തിനാണ് കോടതി മുൻഗണന നൽകിയത്. കസാർ സമർപ്പിച്ച പുതിയ താമസാനുമതി അപേക്ഷകളിൽ അന്തിമ തീരുമാനം ഉണ്ടാകുന്നത് വരെ അദ്ദേഹത്തിന് കാനഡയിൽ തുടരാം. 2018-ലാണ് മയക്കുമരുന്ന് കേസുമായി ബന്ധപ്പെട്ട് ഇദ്ദേഹത്തിന് 45 മാസത്തെ തടവ് ശിക്ഷ ലഭിച്ചത്.