കുട്ടികളുടെ സുരക്ഷയ്ക്കായി 'ട്രൈബെല'; സോഷ്യൽ മീഡിയ ലോകത്ത് പുതിയ വിപ്ലവവുമായി വാൻകൂവർ സ്വദേശിനി

സോഷ്യൽ മീഡിയയിലെ സൈബർ ബുള്ളിയിംഗും  ദോഷകരമായ ഉള്ളടക്കങ്ങളും കുട്ടികളെ എങ്ങനെ ബാധിക്കുന്നു എന്ന തിരിച്ചറിവിൽ നിന്നാണ് നതാലി ബോൾ 'ട്രൈബെല' എന്ന പുതിയ പ്ലാറ്റ്‌ഫോമിന് രൂപം നൽകിയത്. തന്റെ മകൾ നേരിട്ട ദുരനുഭവങ്ങളെത്തുടർന്ന് സോഷ്യൽ മീഡിയയിൽ നിന്ന് പൂർണ്ണമായും വിട്ടുനിൽക്കാൻ ശ്രമിച്ച നതാലി, അത് സാമൂഹികമായ ഒറ്റപ്പെടലിന് കാരണമാകുന്നു എന്ന് മനസ്സിലാക്കി. ഇതിനൊരു മാർഗ്ഗമെന്ന നിലയിലാണ് ഓക്സ്ഫോർഡ് സർവകലാശാലയിലെ വിദഗ്ധരുടെ സഹായത്തോടെ അവർ ട്രൈബെല വികസിപ്പിച്ചത്.

നിലവിലുള്ള പ്രമുഖ പ്ലാറ്റ്‌ഫോമുകൾ മുതിർന്നവർക്കായി രൂപകൽപ്പന ചെയ്തതാണെന്നും കുട്ടികളുടെ സുരക്ഷാ ഫീച്ചറുകൾ പിന്നീട് കൂട്ടിച്ചേർത്തവയാണെന്നും നതാലി ചൂണ്ടിക്കാട്ടുന്നു. 'സേഫ്റ്റി-ബൈ-ഡിസൈൻ'  എന്ന ആശയത്തിലാണ് ട്രൈബെല പ്രവർത്തിക്കുന്നത്. അമിതമായ ഉപയോഗത്തിന് പ്രേരിപ്പിക്കുന്ന ഇൻഫിനിറ്റ് സ്ക്രോളിംഗ്  ലൈക്കുകൾ, ഫോളോവേഴ്‌സ് കൗണ്ട്, തനിയെ പ്ലേ ആകുന്ന വീഡിയോകൾ എന്നിവ ഈ ആപ്പിൽ ഒഴിവാക്കിയിട്ടുണ്ട്. അശ്ലീലമോ അക്രമാസക്തമോ ആയ ഉള്ളടക്കങ്ങൾ തടയാൻ AI ഉപയോഗിച്ചുള്ള ഓട്ടോമാറ്റിക് മോഡറേഷൻ സംവിധാനവും ഇതിലുണ്ട്.

കുട്ടികൾക്ക് സുരക്ഷിതമായി ആശയവിനിമയം നടത്താനും സർഗ്ഗാത്മകമായി ഇടപെടാനും സാധിക്കുന്ന ഒരു ഇടമാണ് ട്രൈബെല ലക്ഷ്യമിടുന്നത്. ഓസ്‌ട്രേലിയ ഉൾപ്പെടെയുള്ള രാജ്യങ്ങൾ കുട്ടികൾക്ക് സോഷ്യൽ മീഡിയ നിരോധനം ഏർപ്പെടുത്തുന്ന സാഹചര്യത്തിൽ ട്രൈബെല പോലുള്ള പ്ലാറ്റ്‌ഫോമുകൾ വലിയ പ്രതീക്ഷയാണ് നൽകുന്നത്.