കാനഡയിൽ ഇലക്ട്രിക് വാഹനങ്ങൾക്ക് സബ്‌സിഡി പ്രഖ്യാപിച്ചു; ഇന്ധനച്ചെലവിൽ വൻ ലാഭമെന്ന് വിലയിരുത്തൽ

കാനഡയിലെ വാഹന മേഖലയിൽ വലിയ മാറ്റങ്ങൾ ലക്ഷ്യമിട്ട് ഫെഡറൽ ഗവൺമെൻ്റ് പുതിയ ഇലക്ട്രിക് വാഹന സബ്‌സിഡി പദ്ധതിക്ക് തുടക്കം കുറിച്ചു. ഫെബ്രുവരി 16 മുതൽ പ്രാബല്യത്തിൽ വന്ന ഈ പദ്ധതി പ്രകാരം, 50,000 ഡോളർ വരെ വിലയുള്ള പൂർണ്ണമായും ഇലക്ട്രിക് ആയ വാഹനങ്ങൾക്ക് 5,000 ഡോളർ വരെയും, പ്ലഗ്-ഇൻ ഹൈബ്രിഡ് വാഹനങ്ങൾക്ക് 2,500 ഡോളർ വരെയും സബ്‌സിഡി ലഭിക്കും.

കാനഡയിൽ നിർമ്മിച്ച വാഹനങ്ങൾക്ക് ഈ നിശ്ചിത വിലപരിധി ബാധകമല്ലെന്നത് ആഭ്യന്തര നിർമ്മാണ മേഖലയ്ക്ക് കരുത്താകും. ഷോറൂമുകളിൽ നിന്നുതന്നെ നേരിട്ട് ഈ ആനുകൂല്യം ലഭ്യമാകുന്ന രീതിയിലാണ് പദ്ധതി വിഭാവനം ചെയ്തിരിക്കുന്നത്. കൂടാതെ, രാജ്യത്തുടനീളം 8,000 പുതിയ ചാർജിംഗ് സ്റ്റേഷനുകൾ സ്ഥാപിക്കുമെന്നും വൈദ്യുതി ഉൽപ്പാദനം വർദ്ധിപ്പിക്കുമെന്നും പ്രധാനമന്ത്രി മാർക്ക് കാർണി വ്യക്തമാക്കി.  

ഇലക്ട്രിക് വാഹനങ്ങളിലേക്ക് മാറുന്നത് ഉപഭോക്താക്കൾക്ക് ദീർഘകാലാടിസ്ഥാനത്തിൽ വലിയ സാമ്പത്തിക ലാഭം നൽകുമെന്ന് വിദഗ്ധർ ചൂണ്ടിക്കാട്ടുന്നു. പെട്രോൾ വാഹനങ്ങളുമായി താരതമ്യം ചെയ്യുമ്പോൾ ഇലക്ട്രിക് വാഹനങ്ങളുടെ ചാർജിംഗ് ചെലവ് വളരെ കുറവാണ്. ഉദാഹരണത്തിന്, ഒരു സാധാരണ പെട്രോൾ കാറിന് വർഷം തോറും ശരാശരി 2,000 ഡോളർ ഇന്ധനത്തിനായി ചെലവാകുമ്പോൾ, സമാനമായ ഒരു ഇലക്ട്രിക് കാറിന് ചാർജിംഗ് ചെലവ് ഏകദേശം 660 ഡോളർ മാത്രമാണ്.

വീട്ടിൽ തന്നെ ചാർജിംഗ് സൗകര്യം ഒരുക്കുന്നതാണ് ഏറ്റവും ലാഭകരമെന്ന് സിഗ്നേച്ചർ ഇലക്ട്രിക് സ്ഥാപകൻ മാർക്ക് മർമർ പറയുന്നു. ഏകദേശം 1,000 മുതൽ 2,000 ഡോളർ വരെ ചെലവിൽ ഇത്തരം സിസ്റ്റങ്ങൾ വീട്ടിൽ ഇൻസ്റ്റാൾ ചെയ്യാൻ സാധിക്കും. പ്രാരംഭ ഘട്ടത്തിൽ ഇലക്ട്രിക് വാഹനങ്ങൾക്ക് വില അല്പം കൂടുതലാണെങ്കിലും, സർക്കാർ നൽകുന്ന സബ്‌സിഡിയും ഇന്ധനച്ചെലവിലെ വൻ കുറവും സാധാരണക്കാർക്ക് വലിയ ആശ്വാസമാകുമെന്ന് റിപ്പോർട്ടുകൾ വ്യക്തമാക്കുന്നു.