മഞ്ഞുവീഴ്ചയിലെ അപകടങ്ങൾ നിസ്സാരമായി കാണരുത്; അർഹമായ നിയമപരിരക്ഷകൾ തിരിച്ചറിയണമെന്ന് വിദഗ്ധർ

 

കാനഡയിൽ ശൈത്യകാലം കടുക്കുന്നതോടെ മഞ്ഞുവീഴ്ചയും ഐസും മൂലമുണ്ടാകുന്ന അപകടങ്ങൾ വർദ്ധിക്കുന്നു. മഞ്ഞിൽ തെന്നിവീണുണ്ടാകുന്ന പരിക്കുകളെ വെറുമൊരു 'അപകടം' എന്നതിലുപരി, കൃത്യമായ നിയമപരിരക്ഷയും നഷ്ടപരിഹാരവും അർഹിക്കുന്ന വിഷയമായി കാണണമെന്ന് നിയമവിദഗ്ധർ മുന്നറിയിപ്പ് നൽകുന്നു.
 
മഞ്ഞിൽ തെന്നിവീഴുമ്പോൾ സംഭവിക്കുന്ന പരിക്കുകൾ പലപ്പോഴും ദീർഘകാല ചികിത്സ ആവശ്യമായവയാണ്. പ്രത്യേകിച്ചും പ്രായമായവരിൽ സംഭവിക്കുന്ന ഇടുപ്പെല്ല് പൊട്ടുന്നത് അവരുടെ സ്വതന്ത്രമായ ജീവിതത്തെ തന്നെ ഇല്ലാതാക്കുന്നു. മാസങ്ങളോളം ജോലിക്ക് പോകാൻ കഴിയാതെ വരുന്നത് സാമ്പത്തിക ഭദ്രതയെ ഗുരുതരമായി ബാധിക്കും. എന്നാൽ ഇത്തരം സാഹചര്യങ്ങളിൽ ഇൻഷുറൻസ് ക്ലെയിമുകൾക്കോ നിയമപരമായ നഷ്ടപരിഹാരത്തിനോ ശ്രമിക്കാൻ പലരും മടിക്കുന്നത് അറിവില്ലായ്മ മൂലമാണ്.
 
കാനഡയിലെ നിയമപ്രകാരം, തങ്ങളുടെ ഉടമസ്ഥതയിലുള്ള സ്ഥലത്തെ നടപ്പാതകൾ ഐസും മഞ്ഞും നീക്കം ചെയ്ത് സുരക്ഷിതമായി സൂക്ഷിക്കേണ്ടത് വസ്തുവുടമകളുടെ  നിയമപരമായ ബാധ്യതയാണ്. ഇതിൽ വീഴ്ച വരുത്തുന്നത് മൂലമാണ് ഒരാൾക്ക് അപകടം സംഭവിക്കുന്നതെങ്കിൽ, ചികിത്സാ ചിലവിനും വരുമാന നഷ്ടത്തിനും ആ വസ്തുവുടമയോ ഇൻഷുറൻസ് കമ്പനിയോ നഷ്ടപരിഹാരം നൽകാൻ ബാധ്യസ്ഥരാണ്. അപകടം നടന്നാൽ സ്വീകരിക്കേണ്ട ചില അടിയന്തര നടപടികളുണ്ടെന്ന് വിദഗ്ധർ പറയുന്നു. അപകടം നടന്ന ഉടൻ തന്നെ സ്ഥലത്തെ മഞ്ഞിന്റെയോ ഐസിന്റെയോ അവസ്ഥ വ്യക്തമാക്കുന്ന ഫോട്ടോകൾ എടുക്കുക. സംഭവത്തിന് സാക്ഷികളായവർ ഉണ്ടെങ്കിൽ അവരുടെ വിവരങ്ങൾ ശേഖരിക്കുക. ഉടൻ വൈദ്യസഹായം തേടുകയും എല്ലാ റിപ്പോർട്ടുകളും സൂക്ഷിച്ചുവെക്കുകയും ചെയ്യുക.

പരിക്കുകൾ ചെറുതാണെന്ന് കരുതി ചികിത്സ വൈകിക്കരുത്.ജോലിസമയത്താണ് അപകടമെങ്കിൽ 'Workers’ Compensation' ബോർഡിൽ റിപ്പോർട്ട് ചെയ്യുന്നത് വഴി ആനുകൂല്യങ്ങൾ ഉറപ്പാക്കാം.നിയമനടപടികൾ സങ്കീർണ്ണമാണെന്ന മുൻവിധിയാൽ അർഹമായ ആനുകൂല്യങ്ങൾ ഉപേക്ഷിക്കരുത്. ശരിയായ നിയമസഹായം തേടുന്നത് നിങ്ങളുടെ ആരോഗ്യവും സാമ്പത്തിക ഭാവിയും സംരക്ഷിക്കാൻ അനിവാര്യമാണ്.