ഡൗൺടൗൺ 'ഫ്രീ ഫെയർ സോൺ' നിലനിർത്തുന്ന കാര്യത്തിൽ പൊതുജനങ്ങളുടെ അഭിപ്രായം തേടി കാൽഗറി നഗരസഭ

കാൽഗറി സിട്രെയിൻ സംവിധാനത്തിലെ ഒഴിച്ചുകൂടാനാവാത്ത ഭാഗമായ ഡൗൺടൗൺ 'ഫ്രീ ഫെയർ സോൺ' നിലനിർത്തുന്ന കാര്യത്തിൽ നഗരസഭ പൊതുജനങ്ങളുടെ അഭിപ്രായം തേടുന്നു. കഴിഞ്ഞ 40 വർഷത്തിലേറെയായി നഗരഹൃദയത്തിൽ നിലവിലുള്ള ഈ സൗകര്യം തുടരണോ എന്നതിലാണ് ഇപ്പോൾ ചർച്ചകൾ നടക്കുന്നത്.

7 അവന്യൂവിലൂടെ യാത്ര ചെയ്യുന്നവർക്ക് ടിക്കറ്റില്ലാതെ തന്നെ സഞ്ചരിക്കാൻ അനുവദിക്കുന്ന മേഖലയാണിത്. ഡൗൺടൗൺ വെസ്റ്റ്-കെർബി സ്റ്റേഷൻ മുതൽ സിറ്റി ഹാൾ-ബോ വാലി കോളേജ് സ്റ്റേഷൻ വരെയാണ് ഈ സൗജന്യ സേവനം ലഭ്യമാകുന്നത്. നഗരമധ്യത്തിലെ യാത്ര സുഗമമാക്കുക എന്ന ലക്ഷ്യത്തോടെ 1981-ലാണ് ഈ പദ്ധതിക്ക് തുടക്കമിട്ടത്.  നാല് പതിറ്റാണ്ട് പിന്നിടുമ്പോൾ നഗരത്തിന്റെ ഘടനയിലും ജനസംഖ്യയിലും വലിയ മാറ്റങ്ങൾ വന്നിട്ടുണ്ട്. ഈ സാഹചര്യത്തിൽ, പദ്ധതി ഇപ്പോഴും ഫലപ്രദമാണോ എന്ന് പരിശോധിക്കുകയാണ് അധികൃതർ. ഇതിൻ്റെ ഭാഗമായി ഫെബ്രുവരി 16 മുതൽ ഒരു ഓൺലൈൻ സർവേ ആരംഭിച്ചിട്ടുണ്ട്. മാർച്ച് 8 വരെ നഗരവാസികൾക്ക് ഇതിൽ പങ്കെടുത്ത് തങ്ങളുടെ അഭിപ്രായങ്ങൾ അറിയിക്കാം.

ഈ സൗജന്യ സേവനത്തെ അനുകൂലിക്കുന്നവരും വിമർശിക്കുന്നവരും ഒരുപോലെയുണ്ട്. ഡൗൺടൗണിലെ യാത്രക്കാർക്ക് ഇത് വലിയ ആശ്വാസമാണെന്നും നഗരത്തിലെ വ്യാപാര സ്ഥാപനങ്ങളിലേക്ക് കൂടുതൽ ആളുകളെ ആകർഷിക്കാൻ ഇത് സഹായിക്കുന്നുണ്ടെന്നും ഇവർ കരുതുന്നു. എന്നാൽ പദ്ധതിയുടെ സാമ്പത്തിക വശങ്ങളെക്കുറിച്ച്  പുനപരിശോധന വേണമെന്നാണ് മറ്റ് ചിലരുടെ പക്ഷം. സിട്രെയിനിൻ്റെ ദീർഘകാല വരുമാനം ഉറപ്പാക്കാനുള്ള വഴികളാണ് അധികൃതർ ഇപ്പോൾ ആലോചിക്കുന്നത്.

ഈ സർവേയിലൂടെ ലഭിക്കുന്ന പ്രതികരണങ്ങൾ കാൽഗറി ട്രാൻസിറ്റിൻ്റെ അടുത്ത ഘട്ടത്തിലെ പ്രവർത്തനങ്ങളെയും ടിക്കറ്റ് നിരക്കുകളെയും കാര്യമായി സ്വാധീനിക്കും. അതിനാൽ, സമയം അവസാനിക്കുന്നതിന് മുമ്പ് എല്ലാവരും സർവേയിൽ പങ്കെടുത്ത് തങ്ങളുടെ നിലപാട് വ്യക്തമാക്കണമെന്ന് സിറ്റി അധികൃതർ അഭ്യർത്ഥിച്ചു. നഗരവാസികൾക്ക് weigh in online എന്ന ലിങ്ക് വഴി സർവ്വെയിൽ പങ്കെടുക്കാം.