ഭരണസംവിധാനത്തിൻ്റെ നടത്തിപ്പിനായി സർക്കാർ ചെലവാക്കുന്ന തുകയിൽ കഴിഞ്ഞ പത്ത് വർഷത്തിനിടെ വൻ വർധനവുണ്ടായതായി റിപ്പോർട്ട്

കാനഡയിലെ ഫെഡറൽ ഭരണസംവിധാനത്തിൻ്റെ നടത്തിപ്പിനായി സർക്കാർ ചെലവാക്കുന്ന തുകയിൽ കഴിഞ്ഞ പത്ത് വർഷത്തിനിടെ വൻ വർധനവുണ്ടായതായി റിപ്പോർട്ട്. പാർലമെൻ്ററി ബജറ്റ് ഓഫീസർ (PBO) പുറത്തുവിട്ട പുതിയ കണക്കുകൾ പ്രകാരം സർക്കാർ ചെലവ് 80 ശതമാനത്തോളമാണ് ഉയർന്നത്. ഇത് സംബന്ധിച്ച വിവരങ്ങൾ പുറത്തുവന്നതോടെ വലിയ രാഷ്ട്രീയ ചർച്ചകൾക്കാണ് രാജ്യം സാക്ഷ്യം വഹിക്കുന്നത്.

 2014-ൽ ഏകദേശം 39 ബില്യൺ ഡോളറായിരുന്ന ഫെഡറൽ ചെലവ് 2024-ൽ എത്തുമ്പോൾ 70 ബില്യൺ ഡോളറിന് മുകളിലെത്തിയിരിക്കുകയാണ്. ഉദ്യോഗസ്ഥരുടെ എണ്ണം കുത്തനെ കൂടിയതും ശമ്പളം, പെൻഷൻ തുടങ്ങിയ ആനുകൂല്യങ്ങൾക്കായി ഭീമമായ തുക നീക്കിവെക്കേണ്ടി വന്നതുമാണ് ഈ സാമ്പത്തിക ബാധ്യതയ്ക്ക് പ്രധാന കാരണം. 2014-ൽ 2,50,000 ആയിരുന്ന ഫെഡറൽ ജീവനക്കാരുടെ എണ്ണം നിലവിൽ 3,30,000 കടന്നിട്ടുണ്ട്.

ചെലവ് ഇത്രയധികം വർധിച്ചിട്ടും സാധാരണക്കാർക്ക് ലഭിക്കുന്ന സർക്കാർ സേവനങ്ങളുടെ ഗുണനിലവാരത്തിൽ മാറ്റമില്ലെന്ന് വിമർശകർ ചൂണ്ടിക്കാട്ടുന്നു. കാനഡിയൻ ടാക്സ്പേയേഴ്സ് ഫെഡറേഷൻ (CTF) സർക്കാരിനെതിരെ ശക്തമായ പ്രതിഷേധവുമായി രംഗത്തെത്തി. "നികുതിദായകർക്ക് ഈ അധികഭാരം ഇനി സഹിക്കാനാവില്ല," എന്ന് സി.ടി.എഫ് ഫെഡറൽ ഡയറക്ടർ ഫ്രാങ്കോ ടെറാസ്സാനോ പറഞ്ഞു. അഡ്മിനിസ്ട്രേറ്റീവ് ചെലവുകൾ ഇത്ര വേഗത്തിൽ ഉയരുന്നത് ആശങ്കാജനകമാണെന്നും അദ്ദേഹം കൂട്ടിച്ചേർത്തു.

റിപ്പോർട്ട് പുറത്തുവന്നതോടെ പ്രതിപക്ഷം കാനഡ സർക്കാരിനെതിരെ രൂക്ഷമായ ആക്രമണമാണ് അഴിച്ചുവിടുന്നത്. ചെലവ് നിയന്ത്രിക്കാൻ അടിയന്തര നടപടി വേണമെന്ന് പ്രതിപക്ഷം ആവശ്യപ്പെട്ടു. സേവനങ്ങൾ മെച്ചപ്പെടാതെ ചെലവ് മാത്രം ഉയരുന്നതിൽ ജനങ്ങളും അസന്തുഷ്ടരാണ്.  വരും വർഷങ്ങളിൽ ബ്യൂറോക്രസി ചെലവ് ഇനിയും ഉയരുമെന്ന ആശങ്ക കാനഡയിൽ ശക്തമാണ്.