മനുഷ്യനോട് രൂപത്തിലും ഭാവത്തിലും സാമ്യമുള്ള പുതിയ ഹ്യൂമനോയിഡ് റോബോട്ടിനെ പുറത്തിറക്കി ചൈനീസ് കമ്പനി

മനുഷ്യനോട് രൂപത്തിലും ഭാവത്തിലും സാമ്യമുള്ള പുതിയ ഹ്യൂമനോയിഡ് റോബോട്ടിനെ പുറത്തിറക്കി ചൈനീസ് കമ്പനി. ഷാങ്ഹായ് ആസ്ഥാനമായി പ്രവർത്തിക്കുന്ന DroidUp എന്ന സ്റ്റാർട്ടപ്പാണ് 'മോയ'എന്ന് പേരിട്ടിരിക്കുന്ന പുതിയ ഹ്യൂമനോയിഡ് റോബോട്ടിനെ പുറത്തിറക്കിയത്. 

സാധാരണ റോബോട്ടുകളിൽ നിന്ന് വ്യത്യസ്തമായി, മോയയ്ക്ക് 32 മുതൽ 36 ഡിഗ്രി സെൽഷ്യസ് വരെ താപനിലയുള്ള 'ചൂടുള്ള ചർമ്മം'ഉണ്ട്. ഇത് ലോഹത്തിൻ്റെ തണുപ്പിന് പകരം ഒരു ജീവനുള്ള ശരീരത്തിൻ്റെ അനുഭവം നൽകുന്നു. മനുഷ്യൻ്റെ നടത്തവുമായി 92% കൃത്യതയോടെ സഞ്ചരിക്കാൻ ഈ റോബോട്ടിന് സാധിക്കും. അത്യാധുനിക ക്യാമറ കണ്ണുകൾ ഉപയോഗിച്ച് മോയയേകേകേ ആളുകളുടെ ചലനങ്ങൾ നിരീക്ഷിക്കാനും കഴിയും.

മനുഷ്യവികാരങ്ങൾ മനസ്സിലാക്കാൻ മോയയ്ക്ക് കഴിയുമെന്ന് ഇതിൻ്റെ നിർമ്മാതാക്കൾ അവകാശപ്പെടുന്നു. മുഖഭാവങ്ങളും സംസാരത്തിലെ ശബ്ദവ്യതിയാനങ്ങളും വിശകലനം ചെയ്യാൻ കഴിയുന്ന കൃത്രിമ ബുദ്ധി (AI) വഴിയാണ് ഇത് സാധ്യമാകുന്നത്. മനുഷ്യ ജീവശാസ്ത്രത്തെ അനുകരിക്കുന്നതിനാലാണ് ഇതിനെ 'ബയോമിമെറ്റിക്' എന്ന് കമ്പനി വിശേഷിപ്പിക്കുന്നത്. റോബോട്ടിക് സാങ്കേതികവിദ്യയുടെ കേന്ദ്രമായ ഷാങ്ഹായിലെ 'ഷാങ്‌ജിയാങ് റോബോട്ടിക്സ് വാലി'യിലാണ് മോയയെ അവതരിപ്പിച്ചത്.

നിലവിൽ പല റോബോട്ടുകൾക്കും നടക്കാനും വീട്ടുജോലികൾ ചെയ്യാനും കഴിയുമെങ്കിലും, മനുഷ്യസമാനമായ ശാരീരിക ഊഷ്മാവും വികാരങ്ങൾ തിരിച്ചറിയാനുള്ള കഴിവും മോയയെ വേറിട്ടു നിർത്തുന്നു. ആരോഗ്യ സംരക്ഷണം, വിദ്യാഭ്യാസം, കസ്റ്റമർ സർവീസ് തുടങ്ങിയ മേഖലകളിൽ ഇത്തരം റോബോട്ടുകളെ ഉപയോഗിക്കാൻ കഴിയുമെന്നാണ് വിദഗ്ധർ കരുതുന്നത്.