ഓൺലൈൻ വഴിയുള്ള പാസ്‌പോർട്ട് പുതുക്കലിന് പുതിയ നിയന്ത്രണങ്ങൾ ഏർപ്പെടുത്തി കനേഡിയൻ സർക്കാർ

ഓൺലൈൻ വഴിയുള്ള പാസ്‌പോർട്ട് പുതുക്കലിന് കനേഡിയൻ സർക്കാർ പുതിയ നിയന്ത്രണങ്ങൾ ഏർപ്പെടുത്തി. ഓരോ ദിവസവും നിശ്ചിത എണ്ണം ആളുകൾക്ക് മാത്രമേ ഓൺലൈനായി അപേക്ഷ സമർപ്പിക്കാൻ കഴിയൂ.  ഈ പരിധി കഴിഞ്ഞാൽ, അടുത്ത റീസെറ്റ് സമയം വരെ പുതിയ അപേക്ഷകൾ സ്വീകരിക്കില്ല. ദിവസവും ഈസ്റ്റേൺ ടൈം രാവിലെ ഏഴ് മണിക്കും വൈകുന്നേരം ഏഴ് മണിക്കുമാണ് റീസെറ്റ് സമയം.അതിനാൽ, ഈ സമയത്ത് തന്നെ ലോഗിൻ ചെയ്താൽ അപേക്ഷ സമർപ്പിക്കാൻ കൂടുതൽ എളുപ്പമായിരിക്കും.

ഓൺലൈൻ അക്കൗണ്ട് ക്രിയേറ്റ് ചെയ്യാൻ സമയപരിധിയില്ല. എന്നാൽ അപേക്ഷാ നടപടികൾ തുടങ്ങണമെങ്കിൽ ആ ദിവസത്തെ നിശ്ചിത ക്വാട്ട ബാക്കിയുണ്ടായിരിക്കണം.ഈ നിയന്ത്രണം ഓൺലൈൻ വഴി അപേക്ഷിക്കുന്നവർക്ക് മാത്രമാണ്. തപാൽ വഴിയോ (Mail), പാസ്‌പോർട്ട് ഓഫീസുകളിലും സർവീസ് കാനഡ സെന്ററുകളിലും നേരിട്ട് പോയോ അപേക്ഷിക്കുന്നതിന് യാതൊരു തടസ്സവുമില്ല.

നിലവിൽ കാനഡയിൽ താമസിക്കുന്നവർക്കും, കഴിഞ്ഞ 15 വർഷത്തിനുള്ളിൽ പാസ്‌പോർട്ട് ലഭിച്ചവർക്കും മാത്രമേ ഓൺലൈൻ പുതുക്കൽ സൗകര്യം ഉപയോഗിക്കാൻ കഴിയൂ.അപേക്ഷിക്കുന്നതിന് മുൻപ് ഡിജിറ്റൽ ഫോട്ടോ കയ്യിൽ കരുതുക. വെബ്സൈറ്റിലെ തിരക്കും സാങ്കേതിക തകരാറുകളും ഒഴിവാക്കാനാണ് സർക്കാർ ഇങ്ങനെയൊരു നിയന്ത്രണം കൊണ്ടുവന്നിരിക്കുന്നത്. അടിയന്തരമായി പാസ്‌പോർട്ട് ആവശ്യമുള്ളവർ നേരിട്ട് അപേക്ഷിക്കാനാണ് നിർദ്ദേശം. താമസം ഒഴിവാക്കാൻ മുൻകൂട്ടി പ്ലാൻ ചെയ്യാനും നേരത്തെ അപേക്ഷിക്കാനും സർക്കാർ പൗരന്മാരോട് നിർദ്ദേശിച്ചിട്ടുണ്ട്.
...................