യുഎസ് വ്യാപാര നയങ്ങളിൽ അനിശ്ചിതത്വം: അന്താരാഷ്ട്ര വിപണികളിൽ നേട്ടം കൊയ്ത് കാൽഗറി കമ്പനികൾ

അമേരിക്കൻ പ്രസിഡൻ്റ് ഡൊണാൾഡ് ട്രംപ് കനേഡിയൻ ഉൽപ്പന്നങ്ങൾക്ക് മേൽ താരിഫ് ഏർപ്പെടുത്തിയതിനെത്തുടർന്ന്, കാൽഗറി കമ്പനികളും അമേരിക്കയും തമ്മിലുള്ള വ്യാപാര ഇടപാടുകളിൽ 2025-ൽ വൻ കുറവ് രേഖപ്പെടുത്തി. കാൽഗറി ഇക്കണോമിക് ഡെവലപ്‌മെൻ്റിൻ്റെ (CED) കണക്കുകൾ പ്രകാരം, 2024-ൽ മൊത്തം വ്യാപാരത്തിൻ്റെ 35 ശതമാനമായിരുന്ന അമേരിക്കയുമായുള്ള ഇടപാടുകൾ 2025-ൽ 25 ശതമാനത്തിൽ താഴെയായി കുറഞ്ഞു. അമേരിക്കൻ വിപണിയിലെ അനിശ്ചിതത്വവും അധിക നികുതികളും പ്രാദേശിക കമ്പനികളെ മറ്റ് വിദേശ വിപണികൾ തേടാൻ പ്രേരിപ്പിച്ചതായി സി.ഇ.ഡി പ്രസിഡൻ്റ് ബ്രാഡ് പാരി വ്യക്തമാക്കി.

അമേരിക്ക ഇപ്പോഴും തങ്ങളുടെ പ്രധാന വ്യാപാര പങ്കാളിയാണെങ്കിലും, സാധ്യതകൾ വർദ്ധിപ്പിക്കുന്നതിനായി മറ്റ് വിപണികൾ കൂടി കണ്ടെത്തേണ്ടത് അനിവാര്യമാണെന്ന് അദ്ദേഹം കൂട്ടിച്ചേർത്തു.  അതേസമയം, അമേരിക്കയിലുണ്ടായ ഈ കുറവ് മറ്റ് രാജ്യങ്ങളുമായുള്ള വ്യാപാരത്തിലൂടെ പരിഹരിക്കാൻ കാൽഗറി കമ്പനികൾക്ക് സാധിച്ചു. ആറ് ഭൂഖണ്ഡങ്ങളിലായി 21 രാജ്യങ്ങളിലേക്ക് തങ്ങളുടെ പ്രവർത്തനം വ്യാപിപ്പിച്ച ഈ കമ്പനികൾ, 45 പുതിയ അന്താരാഷ്ട്ര വ്യാപാര കരാറുകളിലൂടെ ഏകദേശം 60 ദശലക്ഷം ഡോളർ വരുമാനം നേടി. ഇത് മുൻവർഷത്തെ അപേക്ഷിച്ച് വരുമാനത്തിൽ 500 ശതമാനത്തിൻ്റെ വൻ വർദ്ധനവാണ് രേഖപ്പെടുത്തുന്നത്. ക്ലീൻ എനർജി, അഗ്രി-ഫുഡ്, ഡിജിറ്റൽ സാങ്കേതികവിദ്യ, ബഹിരാകാശ ഗവേഷണം തുടങ്ങിയ മേഖലകളിലെ കമ്പനികളാണ് പ്രധാനമായും യൂറോപ്പ്, മിഡിൽ ഈസ്റ്റ്, ഏഷ്യ, ലാറ്റിൻ അമേരിക്ക എന്നിവിടങ്ങളിലെ പുതിയ വിപണികൾ കണ്ടെത്തിയത്.