കാനഡയിൽ തോക്ക് നിയമങ്ങൾ കർശനമാക്കുന്നു: ടംബ്ലർ റിഡ്ജ് വെടിവെപ്പിന് പിന്നാലെ ചർച്ചകൾ സജീവം

കാനഡയിലെ ബ്രിട്ടീഷ് കൊളംബിയയിലുള്ള ടംബ്ലർ റിഡ്ജിൽ ചൊവ്വാഴ്ചയുണ്ടായ വെടിവെപ്പിൽ പ്രതിയുൾപ്പെടെ ഒൻപത് പേർ കൊല്ലപ്പെട്ടത് രാജ്യത്തെ തോക്ക് നിയന്ത്രണ നിയമങ്ങളെക്കുറിച്ചുള്ള ചർച്ചകൾ വീണ്ടും സജീവമാക്കുകയാണ്. 2020 ഏപ്രിലിൽ നോവ സ്കോഷ്യയിലുണ്ടായ സമാനമായ കൂട്ടക്കുരുതിക്ക് ശേഷം കാനഡയിൽ തോക്ക് നിയമങ്ങൾ പരിഷ്കരിക്കാനുള്ള നടപടികൾ ഊർജ്ജിതമായിരുന്നു.

ടംബ്ലർ റിഡ്ജ് സംഭവത്തിൽ ഒരു ലോങ്ങ് ഗണ്ണും  പരിഷ്കരിച്ച കൈത്തോക്കുമാണ്  കണ്ടെടുത്തതെന്ന് ആർ.സി.എം.പി ഡെപ്യൂട്ടി കമ്മീഷണർ ഡ്വെയ്ൻ മക്ഡൊണാൾഡ് അറിയിച്ചു. ഈ ആയുധങ്ങളുടെ ഉറവിടത്തെക്കുറിച്ചും അവ എങ്ങനെ ഉപയോഗിക്കപ്പെട്ടു എന്നതിനെക്കുറിച്ചും വിശദമായ അന്വേഷണം നടന്നുവരികയാണ്. യുദ്ധഭൂമിയിൽ മാത്രം ഉപയോഗിക്കേണ്ടവയാണെന്ന കാരണത്താൽ, 2020 മെയ് മുതൽ ഏകദേശം 2,500 തരം തോക്കുകൾക്ക് ലിബറൽ സർക്കാർ നിരോധനം ഏർപ്പെടുത്തിയിട്ടുണ്ട്. ഒക്ടോബർ 30-ഓടെ അവസാനിക്കുന്ന അമ്നസ്റ്റി കാലാവധിക്ക് മുൻപായി നിരോധിച്ച ആയുധങ്ങൾ ഉടമകൾ അധികൃതർക്ക് കൈമാറേണ്ടതുണ്ട്. സർക്കാരിൻ്റെ ഈ നടപടിയെ അനുകൂലിച്ചും പ്രതികൂലിച്ചും ശക്തമായ വാദപ്രതിവാദങ്ങൾ നടക്കുന്നുണ്ട്. സാധാരണക്കാരായ തോക്ക് ഉടമകളെ സർക്കാർ വേട്ടയാടുകയാണെന്ന് കൺസർവേറ്റീവ് പാർട്ടി ഉൾപ്പെടെ  കുറ്റപ്പെടുത്തുമ്പോൾ, ഗോത്രവർഗ്ഗക്കാർ വേട്ടയാടാൻ ഉപയോഗിക്കുന്ന എസ്‌.കെ.എസ് (SKS) റൈഫിളുകൾ കൂടി നിരോധിക്കാത്തതിൽ നിയന്ത്രണങ്ങളെ അനുകൂലിക്കുന്നവർ അതൃപ്തി പ്രകടിപ്പിക്കുന്നുണ്ട്.