പുതിയ യുഎസ് അറ്റോര്ണിയെ മണിക്കൂറുകള്ക്കുള്ളില് പുറത്താക്കി ട്രംപ് ഭരണകൂടം; ട്രംപ് ഭരണകൂടവും കോടതിയും തമ്മില് പോര്
By: 600002 On: Feb 13, 2026, 7:11 AM
പി പി ചെറിയാന്
ന്യൂയോര്ക്ക്: ന്യൂയോര്ക്കിലെ അല്ബാനിയില് ഫെഡറല് ജഡ്ജിമാര് നിയമിച്ച പുതിയ യുഎസ് അറ്റോര്ണിയെ മണിക്കൂറുകള്ക്കുള്ളില് പുറത്താക്കി ട്രംപ് ഭരണകൂടം.
ബുധനാഴ്ച രാവിലെ ജഡ്ജിമാരുടെ പാനല് നിയമിച്ച മുന് പ്രോസിക്യൂട്ടര് ഡൊണാള്ഡ് ടി. കിന്സെല്ലയെയാണ് നീതിന്യായ വകുപ്പ് രാത്രിയോടെ ജോലിയില് നിന്ന് നീക്കിയത്.
ഫെഡറല് പ്രോസിക്യൂട്ടര്മാരെ നിയമിക്കുന്നതുമായി ബന്ധപ്പെട്ട് ട്രംപ് ഭരണകൂടവും നീതിന്യായ വ്യവസ്ഥയും തമ്മില് മാസങ്ങളായി നിലനില്ക്കുന്ന തര്ക്കത്തിന്റെ തുടര്ച്ചയാണിത്.
ട്രംപ് നാമനിര്ദ്ദേശം ചെയ്ത ജോണ് സര്ക്കോണ് നിയമവിരുദ്ധമായാണ് പദവിയില് തുടരുന്നതെന്ന് കോടതി നേരത്തെ കണ്ടെത്തിയിരുന്നു. ഇതിനെത്തുടര്ന്നാണ് ജഡ്ജിമാര് കിന്സെല്ലയെ നിയമിച്ചത്.
ഇടക്കാല അറ്റോര്ണിയുടെ കാലാവധി കഴിയുമ്പോള്, ആ പദവിയിലേക്ക് താല്ക്കാലികമായി ഒരാളെ നിയമിക്കാന് നിയമം അനുവദിക്കുന്നുണ്ടെന്ന് ചൂണ്ടിക്കാട്ടിയാണ് ജഡ്ജിമാര് കിന്സെല്ലയെ നിയമിച്ചത്.
ബുധനാഴ്ച വൈകിട്ട് ഡെപ്യൂട്ടി അറ്റോര്ണി ജനറല് ടോഡ് ബ്ലാഞ്ച് എക്സിലൂടെ (X) കിന്സെല്ലയെ പുറത്താക്കിയ വിവരം അറിയിച്ചു. 'യുഎസ് അറ്റോര്ണിമാരെ തിരഞ്ഞെടുക്കുന്നത് ജഡ്ജിമാരല്ല, പ്രസിഡന്റാണ്,' എന്ന് അദ്ദേഹം വ്യക്തമാക്കി.
ലറ്റീഷ്യ ജയിംസ് (ന്യൂയോര്ക്ക് അറ്റോര്ണി ജനറല്), ജെയിംസ് കോമി (മുന് എഫ്ബിഐ ഡയറക്ടര്) തുടങ്ങിയ ട്രംപിന്റെ രാഷ്ട്രീയ എതിരാളികള്ക്കെതിരെയുള്ള അന്വേഷണങ്ങള്ക്കും ഈ തര്ക്കം തടസ്സമായിട്ടുണ്ട്. ലറ്റീഷ്യ ജയിംസിനെതിരായ അന്വേഷണത്തിന്റെ മേല്നോട്ടത്തില് നിന്ന് സര്ക്കോണിനെ കോടതി വിലക്കിയിരുന്നു.
സെനറ്റിന്റെ അംഗീകാരമില്ലാതെ താല്ക്കാലികമായി സ്വന്തം ആള്ക്കാരെ പ്രധാന തസ്തികകളില് നിലനിര്ത്താന് ട്രംപ് ഭരണകൂടം ശ്രമിക്കുന്നുവെന്ന് വിമര്ശകര് ആരോപിക്കുന്നു. എന്നാല്, പ്രോസിക്യൂട്ടര്മാരെ തിരഞ്ഞെടുക്കാനുള്ള അധികാരം പ്രസിഡന്റിനാണെന്നാണ് നീതിന്യായ വകുപ്പിന്റെ വാദം.
ന്യൂജേഴ്സി, കാലിഫോര്ണിയ, വിര്ജീനിയ, നെവാഡ തുടങ്ങി വിവിധ ഇടങ്ങളില് സമാനമായ തര്ക്കങ്ങള് നിലനില്ക്കുന്നുണ്ട്. ഇത് അമേരിക്കന് നീതിന്യായ വ്യവസ്ഥയില് അസാധാരണമായ ഒരു ഭരണഘടനാ പ്രതിസന്ധിക്ക് വഴിതെളിച്ചിരിക്കുകയാണ്.