എണ്ണവില ഇടിവ്: ആൽബെർട്ടയിൽ വലിയ സാമ്പത്തിക പ്രതിസന്ധി എന്ന് പ്രീമിയർ ഡാനിയേൽ സ്മിത്ത്

 

എണ്ണവില ഇടിവ് ആൽബർട്ടയ്ക്ക് തിരിച്ചടിയാകുന്നു. വില കുറയുന്നത് ആൽബെർട്ടയുടെ സാമ്പത്തിക കമ്മി രൂക്ഷമാക്കുമെന്ന് പ്രീമിയർ ഡാനിയേൽ സ്മിത്ത് പറഞ്ഞു. വരാനിരിക്കുന്ന ബജറ്റ് വളരെ കടുപ്പമേറിയതായിരിക്കുമെന്ന് അവർ മുന്നറിയിപ്പ് നൽകി. നിലവിലെ പ്രതിസന്ധി പരിഹരിക്കാൻ നികുതി വർദ്ധിപ്പിക്കില്ലെന്നും സ്മിത്ത് വ്യക്തമാക്കി. ജനങ്ങൾക്കുള്ള സേവനങ്ങളിൽ വലിയ വെട്ടിക്കുറയ്ക്കലുകൾ നടത്തില്ലെന്നും അവർ ഉറപ്പുനൽകി.

വരും വർഷങ്ങളിൽ ആൽബെർട്ട ഒന്നിലധികം സാമ്പത്തിക കമ്മി ബജറ്റുകൾ അവതരിപ്പിക്കേണ്ടി വരുമെന്ന് ഡാനിയേൽ സ്മിത്ത് പറഞ്ഞു.  എല്ലാ പദ്ധതികൾക്കും പണം നൽകാൻ സർക്കാരിന് കഴിയില്ലെന്ന് പ്രീമിയർ സമ്മതിച്ചു. എന്നാൽ ആരോഗ്യമേഖല, വിദ്യാഭ്യാസം, അടിസ്ഥാന സൗകര്യ വികസനം എന്നിവയ്ക്ക് മുൻഗണന നല്കും. കുടുംബങ്ങൾ മികച്ച ആരോഗ്യ-വിദ്യാഭ്യാസ സംവിധാനങ്ങളെയാണ് ആശ്രയിക്കുന്നതെന്ന് അവർ ഓർമ്മിപ്പിച്ചു. അതിനാൽ ഈ മേഖലകളിൽ പണം കുറയ്ക്കുന്നത് ആലോചിക്കാനാവില്ലെന്ന് സ്മിത്ത് പറഞ്ഞു. 

സാമ്പത്തിക കമ്മി പ്രവിശ്യയുടെ മേൽ വലിയ സമ്മർദ്ദം ഉണ്ടാക്കുമെന്ന് അവർ സമ്മതിച്ചു.മുൻഗണനാ ക്രമങ്ങൾ വളരെ ശ്രദ്ധയോടെ സർക്കാർ കൈകാര്യം ചെയ്യേണ്ടതുണ്ട്. ആൽബെർട്ടയുടെ സമ്പദ്‌വ്യവസ്ഥ പ്രധാനമായും എണ്ണയിൽ നിന്നുള്ള വരുമാനത്തെയാണ് ആശ്രയിക്കുന്നത്. എണ്ണവില ഇടിയുമ്പോൾ സർക്കാരിന്റെ വരുമാനത്തിലും വലിയ കുറവുണ്ടാകുന്നു. ഈ സാഹചര്യം നേരിടാൻ ശക്തമായ നടപടികൾ ആവശ്യമാണെന്ന് സ്മിത്ത് ഊന്നിപ്പറഞ്ഞു. കടുത്ത സാമ്പത്തിക വെല്ലുവിളികൾക്കിടയിലും ജനക്ഷേമം ഉറപ്പാക്കാനാണ് സർക്കാർ ശ്രമിക്കുന്നത്. നവംബർ മാസത്തെ കണക്കനുസരിച്ച് ആൽബെർട്ട 6.4 ബില്യൺ ഡോളറിൻ്റെ കമ്മി പ്രതീക്ഷിച്ചിരുന്നു. ഒരു ബാരൽ എണ്ണയ്ക്ക് 61.50 യുഎസ് ഡോളർ എന്ന നിരക്കിനെ അടിസ്ഥാനമാക്കിയായിരുന്നു ഈ കണക്ക്.