ഇന്ധനക്ഷാമത്തിൽ നടുങ്ങി ക്യൂബ; റിസോർട്ടുകൾ അടച്ചുപൂട്ടുന്നു, ടൂറിസം മേഖല തകർച്ചയിൽ

ഇന്ധനക്ഷാമം രൂക്ഷമായതോടെ ക്യൂബയിലെ വിനോദസഞ്ചാര മേഖല കടുത്ത പ്രതിസന്ധിയിലേക്ക് നീങ്ങുന്നു. ഇന്ധനത്തിൻ്റെ ലഭ്യത കുറഞ്ഞതോടെ രാജ്യത്തെ പല പ്രമുഖ റിസോർട്ടുകളും താൽക്കാലികമായി അടച്ചുപൂട്ടാൻ നിർബന്ധിതരായിരിക്കുകയാണ്. ഹോട്ടലുകളുടെയും റിസോർട്ടുകളുടെയും ദൈനംദിന പ്രവർത്തനങ്ങൾ അവതാളത്തിലായതോടെ വിദേശ സഞ്ചാരികളുടെ അവധിക്കാലം ദുരിതപൂർണ്ണമായി.

 ഇന്ധന പ്രതിസന്ധി വിമാന സർവീസുകളെയും കാര്യമായി ബാധിച്ചു. എയർ കാനഡ, എയർ ട്രാൻസാറ്റ് തുടങ്ങിയ പ്രമുഖ കമ്പനികൾ ക്യൂബയിലേക്കുള്ള തങ്ങളുടെ സർവീസുകളിൽ വലിയ മാറ്റങ്ങൾ വരുത്തിയിട്ടുണ്ട്. പല വിമാനങ്ങളും വൈകുകയോ റദ്ദാക്കുകയോ ചെയ്യുന്നത് സഞ്ചാരികളുടെ പ്ലാനുകളെ പൂർണ്ണമായും തകിടം മറിച്ചു. വൈദ്യുതി തടസ്സവും യാത്രാസൗകര്യങ്ങളുടെ കുറവും മൂലം വിനോദസഞ്ചാരികൾ വളരെയധികം ബുദ്ധിമുട്ടുന്ന അവസ്ഥയാണുള്ളത്.

ക്യൂബയുടെ പ്രധാന വരുമാനമാർഗ്ഗമായ ടൂറിസം മേഖല നേരിടുന്ന ഈ തകർച്ച രാജ്യത്തിൻ്റെ സാമ്പത്തിക അടിത്തറയെത്തന്നെ ബാധിക്കുമെന്ന് വിദഗ്ധർ മുന്നറിയിപ്പ് നൽകി. നേരത്തെ തന്നെയുള്ള സാമ്പത്തിക ഉപരോധങ്ങളും പ്രതിസന്ധികളും മൂലം വലയുന്ന ക്യൂബയ്ക്ക്, വർഷങ്ങളായി തുടരുന്ന ഈ ഇന്ധനക്ഷാമം ഇരട്ടി പ്രഹരമാണ് നൽകുന്നത്.

സഞ്ചാരികൾ ശ്രദ്ധിക്കാൻ നിലവിലെ അനിശ്ചിതാവസ്ഥ കണക്കിലെടുത്ത്, ക്യൂബയിലേക്ക് യാത്ര തിരിക്കുന്നവർ വിമാന കമ്പനികളുമായും താമസ സൗകര്യങ്ങൾ ബുക്ക് ചെയ്ത റിസോർട്ടുകളുമായും നേരിട്ട് ബന്ധപ്പെട്ട് സാഹചര്യം ഉറപ്പുവരുത്തണമെന്ന് അധികൃതർ കർശന നിർദ്ദേശം നൽകിയിട്ടുണ്ട്.