ഡേകെയറില് കുഞ്ഞുങ്ങള്ക്ക് വയറിളക്കത്തിനുള്ള മരുന്ന് നല്കിയ അധ്യാപിക പിടിയില്
By: 600002 On: Feb 7, 2026, 9:49 AM
പി പി ചെറിയാന്
ഇല്ലിനോയി: അമേരിക്കയിലെ ഇല്ലിനോയിയില് ഡേകെയറിലെ കുട്ടികള്ക്ക് അവരുടെ സമ്മതമില്ലാതെ വയറിളക്കത്തിനുള്ള മരുന്ന് (Laxatives) നല്കിയ അധ്യാപികയെ പോലീസ് അറസ്റ്റ് ചെയ്തു. സെന്റ് ചാള്സിലെ 'ദി ലേണിംഗ് എക്സ്പീരിയന്സ്' എന്ന സ്ഥാപനത്തിലെ അധ്യാപികയായ യീസല് ജെ. ജുവാരസ് ആണ് പിടിയിലായത്.
രണ്ട് വയസ്സോ അതില് താഴെയോ പ്രായമുള്ള മൂന്ന് കുട്ടികള്ക്ക് ഇവര് മരുന്ന് നല്കിയതായി പോലീസ് സ്ഥിരീകരിച്ചു. കുട്ടികളെ വീട്ടിലേക്ക് നേരത്തെ അയക്കുന്നതിനും തന്റെ ജോലിഭാരം കുറയ്ക്കുന്നതിനുമായി 'മിഠായി' ആണെന്ന് പറഞ്ഞാണ് മരുന്ന് നല്കിയിരുന്നത്.
കുട്ടികള്ക്ക് തുടര്ച്ചയായി വയറിളക്കം ഉണ്ടാകുന്നത് ശ്രദ്ധയില്പ്പെട്ട മാതാപിതാക്കള് പരാതി നല്കിയതോടെയാണ് വിവരം പുറത്തായത്. ഇതേത്തുടര്ന്ന് ഡേകെയര് ഡയറക്ടര് ഇവരെ ജോലിയില് നിന്ന് പിരിച്ചുവിടുകയും പോലീസ് കേസെടുക്കുകയും ചെയ്തു.
മരുന്ന് നല്കിയതിനെത്തുടര്ന്ന് കുട്ടികള്ക്ക് നിര്ജ്ജലീകരണം, വയറുവേദന തുടങ്ങിയ ആരോഗ്യപ്രശ്നങ്ങള് ഉണ്ടായതായി മാതാപിതാക്കള് പറഞ്ഞു.
കുട്ടികളുടെ ജീവന് ഭീഷണിയുയര്ത്തുന്ന രീതിയില് പെരുമാറിയതിനും ശാരീരിക ഉപദ്രവത്തിന് ശ്രമിച്ചതിനും അധ്യാപികയ്ക്കെതിരെ ആറ് മിസ്ഡെമീനര് (Misdemeanor) കേസുകള് ചുമത്തിയിട്ടുണ്ട്.