ജനറൽ മോട്ടോഴ്‌സ് പ്ലാൻ്റുകൾക്ക് അനുവദിച്ച ധനസഹായം പിൻവലിക്കാൻ സർക്കാർ

 

ഒൻ്റാരിയോയിലെ ജനറൽ മോട്ടോഴ്‌സ് പ്ലാൻ്റുകൾക്ക് അനുവദിച്ച ദശലക്ഷക്കണക്കിന് ഡോളറിൻ്റെ ധനസഹായം തിരികെ ഈടാക്കാൻ കനേഡിയൻ സർക്കാർ തീരുമാനിച്ചു. ഒഷാവയിലെ പ്ലാൻ്റിൽ ഉൽപ്പാദന ഷിഫ്റ്റുകൾ വെട്ടിക്കുറച്ചതും ഇൻഗെർസോളിലെ ഇലക്ട്രിക് വാഹന നിർമ്മാണ കേന്ദ്രം അടച്ചുപൂട്ടിയതും മുൻനിർത്തിയാണ് സർക്കാരിൻ്റെ ഈ കർശന നീക്കം.

തൊഴിൽ സംരക്ഷണവും ഉൽപ്പാദന സ്ഥിരതയും ലക്ഷ്യമിട്ട് നൽകിയ ഗ്രാൻ്റുകൾ കമ്പനി ലംഘിച്ചതായി വിദേശകാര്യ മന്ത്രി മെലാനി ജോളി വ്യക്തമാക്കി. നികുതിദായകരുടെ പണം കൃത്യമായ നിബന്ധനകളോടെയാണ് നൽകിയതെന്നും, തൊഴിലവസരങ്ങൾ സൃഷ്ടിക്കുന്നതിൽ പരാജയപ്പെടുന്ന സാഹചര്യത്തിൽ അത് തിരികെ വാങ്ങാൻ സർക്കാർ ബാധ്യസ്ഥരാണെന്നും അവർ കൂട്ടിച്ചേർത്തു.

2022-ൽ ഒഷാവ, ഇൻഗെർസോൾ പ്ലാൻ്റുകളുടെ നവീകരണത്തിനായി ഫെഡറൽ-പ്രൊവിൻഷ്യൽ സർക്കാരുകൾ ഏകദേശം 51.8 കോടി ഡോളറാണ് വാഗ്ദാനം ചെയ്തിരുന്നത്. എന്നാൽ ഒഷാവ പ്ലാൻ്റിലെ മൂന്നാം ഷിഫ്റ്റ് നിർത്തലാക്കിയത് വഴി ഏകദേശം 1,200 ഓളം പേർക്ക് തൊഴിൽ നഷ്ടപ്പെടുന്ന സാഹചര്യമാണ് നിലവിലുള്ളത്. അമേരിക്ക കനേഡിയൻ ഉൽപ്പന്നങ്ങൾക്ക് മേൽ ഏർപ്പെടുത്തിയ വ്യാപാര നിയന്ത്രണങ്ങൾ കമ്പനിയെ പ്രതികൂലമായി ബാധിച്ചിട്ടുണ്ടെങ്കിലും, ആഭ്യന്തര വിപണിയെയും തൊഴിലാളികളെയും സംരക്ഷിക്കുന്നതിൽ വിട്ടുവീഴ്ചയില്ലെന്നാണ് സർക്കാർ നിലപാട്. വ്യവസായ നയങ്ങൾ പാലിക്കുന്നതിൽ കമ്പനികൾ വരുത്തുന്ന വീഴ്ചകൾ ഗൗരവകരമായി കാണുമെന്നും ഈ നടപടി ഒരു മുന്നറിയിപ്പാണെന്നും ഭരണകൂടം അറിയിച്ചു.